Read Shona Union Version 2002 1 VAKORINDE 16 Bible Online

1 VAKORINDE 16 - Shona Union Version 2002 bible

1 VAKORINDE 16

¹Zvino, kana zviri zvipo zvakaunganidzirwa vatsvene, sezvandakaraira kereke reGaratiya, itai nemiwo saizvozvo.

²Nomusi wokutanga wevhiki, mumwe nomumwe wenyu ngaakamure zvimwe kumba kwake, aunganidze, paakawana napo, kuti zvipo zvirege kuunganidzwa, kana ndichisvika.

³Kana ndasvika, ndichatuma avo vamunotenda netsamba, vagondoisa zvipo zvenyu Jerusaremu.

⁴Kana zvakafanira kuti ini ndiendewo, vangaenda neni.

⁵Zvino ndichauya kwamuri, kana ndagura neMakedhonia; nokuti ndinogura neMakedhonia.

⁶Zvimwe ndichagara nemi, kunyange ndipedze chando, kuti mugondiperekedza pose pandinoenda.

⁷Nokuti handidi kukuonai zvino ndiri parwendo; nokuti ndinoti ndichazogara nemi chinguva, kana Ishe achinditendera.

⁸Asi ndichagara paEfeso kusvikira paPendekositi.

⁹Nokuti ndazarurirwa musuo mukuru, une basa guru; navadzivisi vazhinji varipo.

¹⁰Zvino kana Timoti achisvika, chenjerai kuti agare nemi asingatyi; nokuti anobata basa raIshe, sezvandinoita neniwo.

¹¹Naizvozvo ngakurege kuva nomunhu anomuzvidza. Asi muperekedzei norugare, kuti auye kwandiri; nokuti ndakamutarira pamwechete nehama.

¹²Zvino kana ari Aporo, hama yedu, ndakakumbira kwaari zvikuru, kuti auye kwamuri pamwechete nedzimwe hama; asi akanga asingatongodi kuuya zvino, achauya hake kana awana nguva yakanaka.

¹³Rindai, mirai nesimba pakutenda, itai savarume, musimbiswe.

¹⁴Zvose zvamunoita ngazviitwe norudo.

¹⁵Ndinokumbira zvikuru kwamuri, hama dzangu, munoziva mhuri yaSitefani, kuti ndicho chibereko chokutanga paAkaya, vakazviisa kuti vashumire vatsvene.

¹⁶Kuti nemiwo muzviise pasi pavakadaro, napasi pavose vanotibatsira navanobata basa iri.

¹⁷Ndinofara nokuuya kwaSitefani, naFochunatosi, naAkayikosi; nokuti ivo vakandiitira zvamakanga musingagoni kuita imi.

¹⁸Nokuti vakazorodza mweya wangu nowenyu; naizvozvo kudzai vakadaro.

¹⁹Kereke dzapaAsia dzinokukwazisai. Akwira naPirisira vanokukwazisai zvikuru muna Ishe, pamwechete nekereke iri mumba mavo.

²⁰Hama dzose dzinokukwazisai. Kwazisanai nokutsvoda kutsvene.

²¹Ndiko kukwazisa kwangu, ini Pauro, noruoko rwangu.

²²Kana munhu asingadi Ishe, ngaave akatukwa. Ishe anouya!

²³Nyasha dzaIshe Jesu ngadzive nemi.

²⁴Rudo rwangu ngaruve nemi mose muna Kristu Jesu.