Read Shona Union Version 2002 1 VAKORINDE 2 Bible Online

1 VAKORINDE 2 - Shona Union Version 2002 bible

1 VAKORINDE 2

¹Zvino ini, hama dzangu, pakuuya kwangu kwamuri, handina kuuya ndichikuparidzirai uchapupu hwaMwari nokunaka kwamashoko, kana kwouchenjeri.

²Nokuti ndakati, handingazivi chinhu pakati penyu, asi Jesu Kristu iye akaroverwa pamuchinjikwa.

³Ndakanga ndiri pakati penyu noutera, nokutya, nokudedera kukuru,

⁴neshoko rangu nokuparidza kwangu hazvizaiva namashoko okugombedzera ouchenjeri; asi nokuratidza kwoMweya nokwesimba;

⁵kuti kutenda kwenyu kurege kuva muuchenjeri hwavanhu, asi musimba raMwari.

⁶Zvino tinotaura uchenjeri pakati pavakakura; asi uchenjeri husati huri hwenyika ino, kana hwavabati venyika ino vanoshayiswa simba.

⁷Asi tinotaura uchenjeri hwaMwari hwakavanzika, hwakafukidzwa, hwakatemerwa kubwinya kwedu naMwari, nyika isati yavapo;

⁸husina kuzikanwa nomumwe wavabati venyika ino; nokuti dai vaihuziva, vangadai vaisarovera Ishe wokubwinya pamuchinjikwa.

⁹Asi sezvazvakanyorwa, zvichinzi, “Izvo zvisina kuonekwa neziso, kana kunzwika nenzeve, Nezvisina kupinda mumwoyo womunhu, Ndizvo Mwari zvaakagadzirira vanomuda.”

¹⁰Nokuti Mwari akazviratidza izvo kwatiri isu naMweya; nokuti Mweya anonzvera zvose, nezvakadzika zvaMwari.

¹¹Nokuti munhu ndoupiko anoziva zvomunhu, asi mweya womunhu uri maari? Saizvozvo hukuna munhu anoziva zvaMwari, asi Mweya waMwari.

¹²Zvino isu hatina kugamuchira mweya wenyika, asi Mweya unobva kuna Mwari; kuti tizive izvo zvatakangopiwa hedu naMwari.

¹³Ndizvo zvatinotaurawo, tisingatauri namashoko atinodzidziswa nouchenjeri hwomunhu, asi anodzidziswa naMweya; tichidudzira zvinhu zvoMweya kuvanhu voMweya.

¹⁴Zvino munhu sezvaakaberekwa haagamuchiri zvinhu zvoMweya waMwari; nokuti upenzi kwaari; haazvinzwisisi, nokuti zvinonzwisiswa naMweya.

¹⁵Asi ari woMweya anonzwisisa zvose, asi iye amene haanzwisiswi nomunhu.

¹⁶Nokuti, “Ndianiko akaziva murangariro waIshe, kuti amudzidzise?” Asi isu tinomurangariro waKristu.