Read Shona Union Version 2002 1 VAKORINDE 3 Bible Online

1 VAKORINDE 3 - Shona Union Version 2002 bible

1 VAKORINDE 3

¹Ini, hama dzangu, ndakanga ndisingagoni kutaura nemi sokuna voMweya, asi sokuna venyama, sokuna vacheche muna Kristu.

²Ndakakupai mukaka munwe, handina kukupai zvokudya; nokuti makanga musingagoni kudya, nazvino hamugoni.

³Nokuti muchiri venyama; nokuti zvapachine godo pakati penyu, negakava, ko hamuzi venyama, muchifamba nomutoo wavanhu here?

⁴Nokuti kana mumwe achiti, “Ini ndiri waPauro;” mumwe, “Ini ndiri waAporo;” ko hamuzi vanhu here?

⁵Zvino Aporo chinyiko? Pauro chinyiko? Vashumiri vamakatenda navo, mumwe nomumwe sezvaakapiwa naIshe.

⁶Ini ndakasima, Aporo akadiridza; asi Mwari akameresa.

⁷Naizvozvo anosima haazi chinhu, kana anodiridza; asi Mwari anomeresa.

⁸Zvino anosima noanodiridza ndavamwe; asi mumwe nomumwe achapiwa mubayiro wake, sezvaakabata basa.

⁹Nokuti tiri vabati pamwechete naMwari; muri munda waMwari, muri imba yaMwari.

¹⁰Nenyasha dzaMwari dzandakapiwa, ndakaronga nheyo somuvaki akachenjera; mumwe anovaka pamusoro padzo. Zvino mumwe nomumwe ngaachenjere kuti anovaka sei pamusoro padzo.

¹¹Nokuti hakuna mumwe angaronga dzimwe nheyo, asi idzo dzakarongwa kare, ndiye Jesu Kristu.

¹²Zvino kana munhu achivaka pamusoro penheyo idzi, ndarama, kana sirivha, kana mabwe anokosha, kana matanda, kana uswa, kana mashanga;

¹³basa romumwe nomumwe richaonekwa; nokuti zuva iro richazvibudisa pachena, nokuti richaratidzwa nomoto; moto uchaedza basa romumwe nomumwe kuti rakadini.

¹⁴Kana basa romunhu raakavaka pamusoro padzo, richigara, achapiwa mubayiro.

¹⁵Kana basa romunhu rikapiswa, ucharasikirwa, asi iye amene achaponeswa, asi soakabuda pamoto.

¹⁶Ko hamuzivi kuti muri temberi yaMwari, uye kuti Mweya waMwari anogara mukati menyu here?

¹⁷Kana munhu achitadzira temberi yaMwari, Mwari achamutadzirawo; nokuti temberi yaMwari itsvene, ndimi iyo.

¹⁸Kurege kuva nomunhu anozvinyengera. Kana munhu achiti ndakachenjera pakati penyu panyika ino, ngaave benzi, kuti ave akachenjera.

¹⁹Nokuti uchenjeri hwenyika ino upenzi kuna Mwari. Nokuti kwakanyorwa kuchinzi, “Anobata vakachenjera pamano avo.”

²⁰Uyezve, “Ishe anoziva ndangariro dzavakachenjera, kuti hadzina maturo.”

²¹Naizvozvo ngakurege kuva nomunhu anovimba navanhu. Nokuti zvinhu zvose dzezvenyu;

²²kana Pauro, kana Aporo, kana Kefasi, kana nyika, kana upenyu, kana rufu, kana zvazvino, kana zvinouya; zvose ndezvenyu;

²³imi muri vaKristu; naKristu ndowaMwari.