Read Shona Union Version 2002 1 VAKORINDE 5 Bible Online

1 VAKORINDE 5 - Shona Union Version 2002 bible

1 VAKORINDE 5

¹Vanhu vose vanoti upombwe huripo pakati penyu, upombwe hwakadaro husingazikanwi kunyange pakati pavahedheni, hwokuti mumwe anogara nomukadzi wababa vake.

²Munozvikudza, hazvizaiva nani here kana makachema, kuti uyo akabata basa iri abviswe pakati penyu?

³Nokuti ini, zvirokwazvo, kunyange ndisipo nomuviri, asi ndiripo hangu nomweya, ndatotongesa uyo akaita chinhu ichi, sendinenge ndiripo,

⁴nemi, makaungana pamwechete nomweya wangu nezita raIshe Jesu Kristu, nesimba raIshe wedu Jesu,

⁵kuti munhu akadai aiswe kuna Satani, nyama iparadzwe, kuti mweya uponeswe pazuva raIshe.

⁶Kuzvirumbidza kwenyu hakuna kunaka. Ko hamuzivi kuti mbiriso shoma inovirisa bundu rose here?

⁷Bvisai mbiriso yekare, kuti muve bundu idzva, sezvamusina kuviriswa. Nokuti Pasika yedu, yakatibayirwa, ndiKristu;

⁸saka ngatiite mutambo, tisingaiti nembiriso yekare, kana nembiriso yokushata nokuipa; asi nechingwa chisina kuviriswa chokururama nezvokwadi.

⁹Ndakakunyorerai netsamba yangu, kuti murege kufambidzana nemhombwe;

¹⁰handiti nemhombwe dzose dzenyika ino, kana vanoruchiva, kana makororo, kana vanonamata zvifananidzo, nokuti kana zvakadaro maifanira kubva panyika.

¹¹Asi zvino ndinokunyorerai, kuti murege kufambidzana nomunhu anoidzwa hama, kana ari mhombwe, kana anoruchiva, kana anonamata zvifananidzo, kana mutuki, kana anosinwa doro, kana gororo; musadya nowakadai.

¹²Nokuti ini ndichatongereiko vari kunze? Ko imi hamutongi vari pakati penyu here?

¹³Asi avo vari kunze. Mwari anovatonga. Bvisai pakati penyu munhu uyo wakaipa.