Read Shona Union Version 2002 1 VAKORINDE 7 Bible Online

1 VAKORINDE 7 - Shona Union Version 2002 bible

1 VAKORINDE 7

¹Zvino kana zviri zvamakandinyorera, ndinoti, Zvakanaka kuti munhu arege kuwana mukadzi.

²Asi nokuda kwoupombwe, murume mumwe nomumwe ngaave nomukadzi wake, nomukadzi mumwe nomumwe ngaave nomurume wake.

³Murume ngaape mukadzi zvakafanira; nomukadzi adarowo kumurume.

⁴Mukadzi haana simba pamusoro pomuviri wake, asi murume; saizvozvowo murume haana simba pamusoro pomuviri wake, asi mukadzi.

⁵Musanyimana, asi muchiita nguva duku, mambotenderana, kuti muve nenguva yokunyengetera, ndokusanganazve, kuti Satani arege kukuedzai pakusagona kwenyu kuzvidzora.

⁶Asi ndinotaura izvi, ndichikutenderai, ndisingarayiri.

⁷Nokuti ndinoda kuti vanhu vose vave seni. Asi munhu mumwe nomumwe ane chipiwa chake, chinobva kuna Mwari, mumwe chorudzi urwu, mumwe chorumwe rudzi.

⁸Asi ndinoti kuna vasina kuwana, nokuchirikadzi, Zvakanaka kuti vagare seni.

⁹Asi kana vasingagoni kuzvidzora, ngavawane; nokuti zviri nani kuti vawane pakutsva.

¹⁰Zvino vakawana ndinovarayira, asi handizini, ndiIshe, kuti mukadzi arege kubva kumurume wake,

¹¹(kana achibva, ngaagare asingawanikwi, kana ayanane nomurume wake); nomurume ngaarege kuramba mukadzi wake.

¹²Zvino kuna vamwe ndinoti ini, haazi Ishe: Kana hama inomukadzi asingatendi, kana iye achida hake kugara naye, ngaarege kumuramba.

¹³Nomukadzi anomurume asingatendi, kana iye achida hake kugara naye, ngaarege kumuramba murume wake,

¹⁴nokuti murume asingatendi anoita mutsvene nomukadzi wake, nomukadzi asingatendi anoitwa mutsvene nomurume; kana zvisina kudaro, vana venyu vaiva netsvina; asi zvino vatsvene.

¹⁵Zvino kana asingatendi achienda, ngaaende hake. Hama, kana iri murume kana mukadzi, haisungwi nezvakadaro; asi Mwari akakudanai kuti muve norugare.

¹⁶Nokuti iwe mukadzi unoziva seiko kuti uchaponesa murume wako? Kana iwe murume, unoziva seiko kuti uchaponesa mukadzi wako?

¹⁷Asi, mumwe nomumwe sezvaakagoverwa naIshe, mumwe nomumwe sezvaakadanwa naMwari ngaafambe saizvozvo. Ndizvo zvandinorayira pakereke dzose.

¹⁸Kana mumwe achinge akadanwa akadzingiswa, ngaarege kuitwa asakadzingiswa; kana mumwe achinge akadanwa asakadzingiswa, ngaarege kudzingiswa.

¹⁹Kudzingiswa hachizi chinhu, nokusadzingiswa hachizi chinhu, asi kuchengeta mirayiro yaMwari.

²⁰Mumwe nomumwe ngaagare pakudanwa kwaakadanwa nako.

²¹Wakadanwa uri muranda here? Usazvidya mwoyo; asi kana ungasunungurwa, zviri nani kuti udaro hako.

²²Nokuti akadanwa muna Ishe, ari muranda, wava musunungurwa waIshe; saizvozvowo, akadanwa akasununguka, wava muranda waKristu.

²³Makatengwa nomutengo; regai kuva varanda vavanhu.

²⁴Hama dzangu, mumwe nomumwe ngaagare pamberi paMwari ipapo paakadanwa napo.

²⁵Zvino, pamusoro pemhandara, handina murayiro waIshe; asi ndinotaura somunhu wakapiwa ngoni naIshe kuti ave akatendeka.

²⁶Naizvozvo ndinoti kuda kwenhamo ino, zvakanaka kuti munhu agare akadaro.

²⁷Wakabatanidzwa nomukadzi here? Usatsvaka kusunungurwa. Wakasunungurwa pamukadzi here? Usatsvaka mukadzi.

²⁸Zvino kana wawana, hauna kutadza; nemhandara kana yawanikwa, haina kutadza. Asi vakadaro vachava nedambudziko panyama; asi ini ndinoda kukutavirirai.

²⁹Zvino ndinozvitaura izvi, hama dzangu, nokuti nguva ipfupi; kuti kubva zvino vana vakadzi vave savasina;

³⁰navanochema vave savasingachemi; navanofara savasingafari; navanotenga savasina chinhu;

³¹navanobata nezvenyika, savasingabatisisi nazvo; nokuti mugariro wenyika ino unopfuura.

³²Zvino ndinoda kuti murege kuva nokufunganya. Asina kuwana, anofunga zvaIshe, kuti angafadza Ishe wake sei.

³³Asi akawana, anofunga zvenyika, kuti angafadza mukadzi wake sei.

³⁴Nomukadzi asina kuwanikwa nemhandara anofunga zvaIshe, kuti ave mutsvene pamuviri napamweya; asi akawanikwa anofunga zvenyika, kuti angafadza murume wake sei.

³⁵Izvi ndinotaura kuti mubatsirwe imi; ndisingadi kukusungai nomusungo, asi nokuda kwezvakafanira, uye kuti munamatire Ishe, musingakanganiswi.

³⁶Asi kana mumwe achifunga kuti haaitiri mukunda wake, yava mhandara, zvakafanira, iye zvaatokura kwazvo hake, ngaaite nokuda kwake, haatadzi; ngavawaniswe havo.

³⁷Asi uyo anomira akasimba pamwoyo pake, asingamanikidzwi nechinhu, asi ane simba pamusoro pokuda kwake, akatema mumwoyo make chinhu ichi, kuti achachengeta mhandara yake, iye anoita zvakanaka.

³⁸Naizvozvo, anomuwanisa anoita zvakanaka; noasingamuwanisi, anoita zvinopfuura nokunaka.

³⁹Mukadzi akasungwa nomurayiro, murume wake achiri mupenyu; zvino kana murume wake afa, asununguka, kuti awanikwe nowaanoda; asi ngazviitwe muna Ishe.

⁴⁰Asi anganyanya kufara kana achigara akadaro, pakufunga kwangu ini; zvino ndinoti neniwo ndinaMweya waMwari.