Read Shona Union Version 2002 2 VAKORINDE 1 Bible Online

2 VAKORINDE 1 - Shona Union Version 2002 bible

2 VAKORINDE 1

¹Pauro, mupostori waKristu Jesu, nokuda kwaMwari, naTimoti, hama yedu kukereke yaMwari iri muKorinde, pamwechete navatsvene vose vari paAkaya yose:

²Nyasha ngadzive nemi, norugare runobva kuna Mwari, Baba vedu, naIshe Jesu Kristu.

³Mwari ngaavongwe, ivo Baba vaIshe wedu Jesu Kristu, Baba vengoni, Mwari wokunyaradza kwose;

⁴iye anotinyaradza pakutambudzika kwedu kwose, kuti isu tive nesimba rokunyaradza vari mukutambudzika kupi nokupi, nokunyaradzwa kwatinonyaradzwa nako naMwari.

⁵Nokuti madambudziko aKristu sezvaakava mazhinji kwatiri, saizvozvowo kunyaradzwa kwedu kwakava kuzhinji naKristu.

⁶Zvino kana tichitambudzika hedu isu, zvinoitwa nokuda kwokunyaradzwa nokuponeswa kwenyu; kana tichinyaradzwa isu, zvinoitwa nokuda kwokunyaradzwa kwenyu, kunokusimbisai kutsungirira pamadambudziko iwayo atinotambudzikawo nawo.

⁷Tariro yedu pamusoro penyu yakasimba, nokuti tinoziva kuti sezvamunosangana nesu pamadambudziko, saizvozvowo pakunyaradzwa.

⁸Nokuti hatidi hama dzangu, kuti murege kuziva kutambudzika kwakatiwira paAsia, kuti takaremerwa kwazvokwazvo kukunda simba redu, nokudaro takarasa mwoyo tichiti hatingararami;

⁹asi pamwoyo pedu isu takanga tatozvitongera rufu, kuti tirege kuvimba nesimba redu, asi naMwari anomutsa vakafa;

¹⁰iye akatisunungura parufu rukuru rwakadai, uye achatisunungurazve; iye watinotenda kuti acharamba achitisunungura;

¹¹nemiwo muchibatsirana pakutikumbirira kwenyu, kuti vanhu vazhinji vavonge pamusoro pedu nokuda kwechipo chedu chenyasha chatakapiwa nokunyengetera kwavazhinji.

¹²Nokuti kuzvirumbidza kwedu ndikoku: Kupupura kwehana yedu, kuti takafamba panyika, zvikuru kwamuri, noutsvene nechokwadi chaMwari, tisingafambi nouchenjeri hwenyama, asi nenyasha dzaMwari.

¹³Nokuti hatikunyorerei zvimwe zvinhu, asi izvo zvamunorava nezvamunotenda; ndinoti dai muchizvitenda kusvikira pakuguma;

¹⁴sezvamakatitendawo panezvimwe, kuti isu tiri kurumbidzwa kwenyu, semiwo muchava kurumbidzwa kwedu nezuva raIshe Jesu.

¹⁵Ndichiziva izvozvi, ndakanga ndichida kutanga kuuya kwamuri, kuti mukomborerwe rwechipiri;

¹⁶ndipfuure nokwenyu ndichienda Makedhonia, nokuuya nokwenyuzve, ndichibva Makedhonia, ndiperekedzwe nemi ndichienda Judhea.

¹⁷Zvino zvandakanga ndichida kuita izvozvo, ndakaita nokusanduka mwoyo here? Kana, zvandinoda kuita ndinozvida nenyama here, kuti ini pamwe nditi, “Hongu, hongu,” pamwe, “Kwete, kwete?”

¹⁸NaMwari akatendeka, shoko redu kwamuri harizi “Hongu” kana “Kwete.”

¹⁹Nokuti Mwanakomana waMwari, Jesu Kristu, uyo akaparidzwa pakati penyu nesu neni naSirivhano naTimoti akanga asiri, “Hongu” kana “Kwete,” asi akanga ari, “Hongu maari.”

²⁰Nokuti zvipikirwa zvaMwari, kunyange zviri zvizhinji sei, maari ndi “Hongu,” naizvozvo naiyewo ndi “Ameni,” kuti Mwari akudzwe nesu.

²¹Zvino, uyo anotisimbisa muna Kristu pamwechete nemi, nokutizodza, ndiMwari;

²²uyo akatiisirawo chisimbiso, akatipa rubatso rwoMweya mumwoyo medu.

²³Asi ndinodana Mwari, ave chapupu pamwoyo wangu, kuti handina kuzouya Korinde, nokuti ndakakunzwirai tsitsi.

²⁴Hatiiti simba nokutenda kwenyu, asi tinokubatsirai kuti mufare; nokuti mumire nokutenda.