Read Shona Union Version 2002 2 VAKORINDE 10 Bible Online

2 VAKORINDE 10 - Shona Union Version 2002 bible

2 VAKORINDE 10

¹Zvino ini Pauro ndinokumbira zvikuru kwamuri nounyoro netsitsi dzaKristu ini muduku kana ndiri pakati penyu, asi ndinotsunga kwamuri kana ndisipo.

²Ndinokumbira kwamuri, kuti kana ndavapo, ndirege kuzotsunga, nokutenda kwandinoti zvino ndichatsunga nako kuna vamwe vanoti tinofamba nenzira yenyama.

³Nokuti, kunyange tichifamba nenzira yenyama, hatirwi nemitoo yenyama;

⁴nokuti nhumbi dzedu dzokurwa nadzo hadzizi dzenyama, asi dzine simba pamberi paMwari rokuputsa nhare;

⁵isu tinoti tichiputsa njere, nezvakakwirira zvose zvinomutswa kuzorwa nokuziva Mwari, tinopa mifungo yose kuti iteerere Kristu;

⁶takazvigadzira kuranga kusateerera kwose, kana kuteerera kwenyu kwazadziswa.

⁷Imi munotarira zvinhu zviri pamberi penyu. Kana munhu achivimba nazvo achiti ndiri waKristu, ngaarangarirezve chinhu ichi mumwoyo make, kuti sezvaari waKristu iye, saizvozvo nesuo.

⁸Nokuti kunyange ndainyanya kuzvirumbidza pamusoro pesimba redu ratakapiwa naIshe kukusimbisai, risati riri rokukuputsai, handinganyadziswi;

⁹kuti ndirege kuita sendinokutyisai netsamba dzangu.

¹⁰Nokuti vanoti, “Tsamba dzake dzina mashoko makuru, dzine simba, asi muviri wake kana aripo, unoutera, nokutaura kwake kunozvidzwa.”

¹¹Munhu akadaro ngaarangarire chinhu ichi, kuti sezvatinoreva mutsamba kana tisipo, ndizvo zvatakaitawo pakuita kwedu kana tiripo.

¹²Nokuti tinotya kuzvienzanisa nokuzvifananidza navamwe vanozvikudza; asi ivo havana njere, zvavanozvienzanisa naivo vamene, nokuzvifananidza naivo vamene.

¹³Zvino isu hatingazvirumbidzi tichipfuura chiyero, asi nechiyero chinosvika pachitanda chatakagoverwa naMwari, kuti chive chiyero, chisvikirewo kwamuri.

¹⁴Nokuti hatinyanyi kuzvitambanudza, sezvatisingasvikiri kwamuri; nokuti tisu takatanga kusvikira kwamuri neVhangeri yaKristu;

¹⁵hatizvirumbidzi tichipfuura chiyero pamusoro pebasa ravamwe; asi tine tariro kuti, kana kutenda kwenyu kuchikura, isu tichakuriswa pakati penyu kusvikira pachitanda chedu nokupfuurisa;

¹⁶tigoparidza Vhangeri panyika dziri mberi kwenyu, tirege kuzvirumbidza pachitanda chomumwe pamusoro pezvatoitwa hazvo.

¹⁷Asi anozvirumbidza, ngaazvirumbidze muna Ishe.

¹⁸Nokuti akatendeka haazi iye anozvirumbidza, asi ndiye anorumbidzwa naIshe.