Read Shona Union Version 2002 2 VAKORINDE 11 Bible Online

2 VAKORINDE 11 - Shona Union Version 2002 bible

2 VAKORINDE 11

¹Dai muchindiitira mwoyo murefu paduku paupenzi hwangu; asi munondiitira henyu mwoyo murefu.

²Nokuti ndine godo pamusoro penyu negodo raMwari; nokuti ndakakuwanisai nomurume mumwe, kuti ndikuisei kuna Kristu semhandara yakachena.

³Asi ndinotya kuti, senyoka yakanyengera Evha namano ayo, zvimwe saizvozvo ndangariro dzenyu dzingasvibiswa, dzitsauke pakururama nokuchena kwomwoyo kuri kuna Kristu.

⁴Nokuti kana mumwe achiuya anoparidza mumwe Jesu, watisina kumboparidza isu, kana zvimwe muchigamuchira mumwe mweya, wamusina kumbogamuchira, kana imwe vhangeri, yamusina kumbotenda, zvino momuitira mwoyo murefu kwazvo.

⁵Nokuti ndinoti handizi muduku napaduku-duku kuvapostori vanopfuura vamwe vose.

⁶Zvino kunyange ndisinganatsi pakutaura, handina kudaro pakuziva; asi pazvinhu zvose takaratidza izvozvo kwamuri pamberi pavose.

⁷Ndakatadza here zvandakazvininipisa kuti imi mukudzwe, zvandakakuparidzirai Vhangeri yaMwari ndisingapiwi mubayiro?

⁸Dzimwe kereke ndakadzitorera, ndichireva mubayiro, kuti ndikushumirei imi.

⁹Uye, panguva yandakanga ndiri kwamuri, ndichishayiwa, handina kuremedza munhu; nokuti zvandakashaiwa ndakapiwa nehama dzaibva Makedhonia; pazvinhu zvose ndakachenjera kuti ndirege kukuremedzai, uye ndicharamba ndichichenjera.

¹⁰Chokwadi chaKristu chiri mandiri, ndinoti kuzvirumbidza uku hakungandidzivisirwi kunyika yeAkaya.

¹¹Nemhaka yeiko? Nokuti handikudi here? Mwari anoziva.

¹²Asi chinhu ichi chandinoita, ndinochiita, kuti ndishayise nzira ivo vanotsvaka nzira; kuti vawanikwe vakaita sesu pazvinhu izvozvo zvavanozvirumbidza nazvo.

¹³Nokuti vakadaro vapostori venhema, vanobata nokunyengera, vanozvishandura vachizviita vapostori vaKristu.

¹⁴Naizvozvi hazvishamisi; nokuti kunyange naSataniwo anozvishandura, achizviita somutumwa wechiedza.

¹⁵Naizvozvo hachizi chinhu chikuru, kana vashumiri vake vachishandurawo, vachizviita savashumiri vokururama; kuguma kwavo kuchava sezvavakabata basa.

¹⁶Ndinopamhidza, ndichiti: Ngakurege kuva nomunhu anoti ndiri benzi; asi kana muchidaro henyu, ndigamuchirei sebenzi, kuti ndizvirumbidze hangu zvishomawo.

¹⁷Zvandinotaura, handizvitauri sezvinobva kuna Ishe, asi sapaupenzi hwangu, pakuzvitenda uku kwatinozvirumbidza nako.

¹⁸Vazhinji zvavanozvirumbidza panyama, neniwo ndichazvirumbidza.

¹⁹Nokuti munoitira mapenzi mwoyo murefu nomufaro, imi muri vakachenjera;

²⁰nokuti munoita nomwoyo murefu kana munhu achikuitai varanda, kana achikuparadzai, kana achikutapai, kana achizvikudza, kana achikurovai kumeso.

²¹Ndinoreva ndichizvishoora, ndichiti takanga tisina simba kudaro. Zvino kana kuno munhu anotsunga, (ndinotaura sebenzi), neni ndinotsungawo.

²²Ivo vaHebheru here? Neniwo. Ivo vaIsiraeri here? Neniwo. Ivo vana vaAbhurahamu here? Neniwo.

²³Ivo vashumiri vaKristu here? (Ndinotaura somunhu anopenga), zvikuru ini; pamabasa ndinovapfuura, pakurohwa zvikuru-kuru, parufu kazhinji.

²⁴Ndakarohwa navaJudha kashanu shamhu dzina makumi matatu nepfumbamwe.

²⁵Katatu ndakarohwa netsvimbo, kamwe ndakatakwa namabwe, katatu ndakaputsikirwa nechikepe, usiku humwe namasikati ndakanga ndiri mugungwa;

²⁶panzendo kazhinji, panjodzi dzenzizi, panjodzi dzamakororo, panjodzi dzovorudzi rwangu, panjodzi dzavahedheni, panjodzi muguta, panjodzi murenje, panjodzi mugungwa, panjodzi pakati pehama dzenhema;

²⁷pakubata basa napakutambura, pakuvata kazhinji takarindira, panzara nenyota, pakuzvinyima zvokudya kazhinji, pachando napakushayiwa zvokufuka.

²⁸Kunze kwaizvozvi, ndinoremedzwa zuva rimwe nerimwe nokurangarira kereke dzose.

²⁹Ndianiko asina simba, neni ndikasava nesimba? Ndianiko anogumburwa, neni ndikasarwadziwa?

³⁰Kana ndikafanira kuzvirumbidza, ndichazvirumbidza nezvinhu zvoutera hwangu.

³¹Mwari, baba vaIshe Jesu, anokudzwa nokusingaperi, anoziva kuti handirevi nhema.

³²PaDhamasiko mubati pasi pamambo Areta akarinda guta raveDhamasiko, achitsvaka kundibata;

³³ndikaburuswa ndiri mudengu napawindo parusvingo, ndikatiza pamaoko ake.