Read Shona Union Version 2002 2 VAKORINDE 2 Bible Online

2 VAKORINDE 2 - Shona Union Version 2002 bible

2 VAKORINDE 2

¹Asi ndakati mumwoyo mangu, kuti handidi kuuyazve kwamuri nokuchema.

²Nokuti kana ndichikuchemedzai, ndianiko achandifadza, kana asiri iye akachemedzwa neni?

³Zvino ndakanyora chinhu ichi kuti kana ndasvika ndirege kuchemedzwa naivo vaifanira kundifadza; ndichikutendai mose, kuti kufara kwangu ndokwenyu mose.

⁴Nokuti ndakakunyorerai nemisodzi mizhinji pakutambudzika kukuru nenhamo yomwoyo; ndisingati muchemedzwe, asi kuti muzive rudo rukuru rwandinokudai narwo.

⁵Zvino kana mumwe akachemedza hake, haana kundichemedza ini, asi ndingati zvimwe ndirege kunyanyisa imi mose.

⁶Kurova uku kwavanhu vazhinji kunoringana munhu wakadai.

⁷Naizvozvo zviri nani kuti mumukanganwire nokumunyaradza, kuti arege kuodzwa mwoyo kwazvo neshungu huru.

⁸Naizvozvo ndinokumbira zvikuru kwamuri kuti musimbise rudo rwenyu kwaari.

⁹Nokuti ndakanyorawo izvi, kuti ndikuedzei, ndizive kana munoteerera pazvinhu zvose.

¹⁰Zvino iye wamunoregerera, neni ndinomuregererawo; nokuti izvo zvandakaregererwa ini, kana ndinenge ndakaregererwa chinhu, ndakazviita nokuda kwenyu pamberi paKristu;

¹¹kuti tirege kunyengerwa naSatani; nokuti mano ake tinoaziva.

¹²Zvino, ndakati ndichisvika paTuroasi kuparidza Vhangeri yaKristu, ndichizarurirwa musuo muna Kristu,

¹³ndakanga ndisina zororo pamweya wangu, nokuti handina kuwanapo Tito, hama yangu; asi ndakaonekana navo, ndikaenda Makedhonia.

¹⁴Asi Mwari ngaavongwe, anotikundisa nguva dzose muna Kristu, anoratidza nesu kwose-kwose hwema hwokuziva kwake.

¹⁵Nokuti isu tiri hwema hwakanaka hwaKristu kuna Mwari, pakati paivo vanoponeswa navanoparara.

¹⁶Kuna vamwe tiri hwema hworufu hunoisa kurufu; kuna vamwe hwema hwoupenyu hunoisa kuupenyu. Zvino ndianiko angakwanisa zvinhu zvakadai?

¹⁷Nokuti hatifanani navamwe vazhinji vanokanganisa shoko raMwari; asi tinotaura muna Kristu nechokwadi, sechinobva kuna Mwari, pamberi paMwari.