Read Shona Union Version 2002 2 VAKORINDE 3 Bible Online

2 VAKORINDE 3 - Shona Union Version 2002 bible

2 VAKORINDE 3

¹Tinotangazve kuzvirumbidza kwamuri here? Tinotsvaka here savamwe tsamba dzinoenda kwamuri, kana dzinobva kwamuri, dzingatirumbidza?

²Imi muri tsamba yedu yakanyorwa mumwoyo medu, inozikanwa nokurahwa navanhu vose;

³makaonekwa kuti muri tsamba yaKristu, yakagadzirwa nesu, isina kunyorwa neingi, asi naMweya waMwari mupenyu; isina kunyorwa pamahwendefa amabwe, asi pamahwendefa enyama omwoyo.

⁴Kutenda kwakadai tinako naKristu, kuna Mwari;

⁵hatiti takakwana isu timene, kuti titeme chinhu timene; asi kukwana kwedu kunobva kuna Mwari;

⁶iye akatikwanisa kuti tive vashumiri vesungano itsva, isati iri yezvakanyorwa asi yoMweya; nokuti zvakanyorwa zvinouraya, asi Mweya anopa upenyu.

⁷Zvino kana kushumira, kwakauyisa rufu, kwakanga kwakatemwa namabhii pamabwe, kwakauya nokubwinya, kwakanga kwadaro kuti vana vaIsiraeri vakakoniwa kutarisisa chiso chaMosesi nokuda kwokubwinya kwechiso chake kwakanga kuchipfuura hako

⁸ko kushumira kwoMweya hakungavi nokubwinya kukuru here?

⁹Nokuti kana kushumira, kwakauyisa kutongeswa, kwakanga kunokubwinya, zvikuru sei kushumira, kunouyisa kururama, kuchakunda pakubwinya.

¹⁰Nokuti naicho chakabwinyiswa, hachina kubwinyiswa, kana pachinhu ichi tichichifananidza nokubwinya kunokunda.

¹¹Nokuti kana icho chinopfuura chaiva nokubwinya, zvikuru sei icho chinogara ndicho chiri pakubwinya.

¹²Naizvozvo, zvatine tariro yakadai, tinotaura tisingatyi napaduku,

¹³tisingaiti saMosesi, waiisa chifukidziro pachiso chake, kuti vana vaIsiraeri varege kutarisisa kuguma kwezvinopfuura.

¹⁴Asi ndangariro dzavo dzakakokomara; nokuti kusvikira zuva ranhasi, kana sungano yakare ichirawa, chifukidziro icho chiripo, chisingaratidzwi kuti muna Kristu zvinopfuura.

¹⁵Asi kusvikira nhasi, kana Mosesi achirawa, chifukidziro chiripo pamwoyo yavo.

¹⁶Zvino kana munhu achitendeukira kuna Ishe, chifukidziro chinobviswa.

¹⁷Ishe ndiMweya; zvino panoMweya waIshe, pane sununguko.

¹⁸Zvino isu tose tinoti tichitarira nechiso chisina kufukidzirwa kubwinya kwaIshe sapachioni-oni, tinosandurwa tichifanana nomufananidzo iwoyo, tichibva pakubwinya kumwe tichienda kunokumwe kubwinya, sezvichibva kuna Ishe, Mweya.