Read Shona Union Version 2002 2 VAKORINDE 5 Bible Online

2 VAKORINDE 5 - Shona Union Version 2002 bible

2 VAKORINDE 5

¹Nokuti tinoziva kuti kana imba yedu yenyika, tabhenakeri yedu, ichiputswa, tine chakavakwa chinobva kuna Mwari, imba isina kuvakwa namaoko, isingaperi, iri kudenga.

²Nokuti tinogomerawo mairi, tichishuva kuti tifukidzwe neimba yedu inobva kudenga;

³kuti kana takafukidza hedu, hatingawanikwi tisina chatakafuka.

⁴Nokuti nesu, tiri mutabhenakeri iyi tinogomera, tichiremerwa; tisingadi kuti tikutunurwe, asi kuti tifukidzwe, kuti chinofa chimedzwe noupenyu.

⁵Zvino, uyo akatigadzirira chinhu ichi ndiMwari, akatipawo rubatso rwoMweya.

⁶Naizvozvo tinotsunga mwoyo nguva dzose, tichiziva kuti kana tichigara mumuviri hatigari kuna Ishe;

⁷nokuti tinofamba nokutenda, hatifambi nokuona;

⁸tinotsunga mwoyo, tichiti zviri nani tirege kugara mumuviri, kuti tigare kuna Ishe.

⁹Saka tinoshingaira kuti timufadze iye, kunyange tichigaramo, kunyange tisingagarimo.

¹⁰Nokuti isu tose tinofanira kuratidzwa pamberi pechigaro chokutonga chaKristu; kuti mumwe nomumwe apiwe zvaakaita nomuviri, sezvaakaita, kana zvakanaka kana zvakaipa.

¹¹Naizvozvo zvatinoziva kutya kwaIshe, tinogombedzera vanhu; asi tinoratidzwa hedu kuna Mwari; uye zvino ndinoti dai tichiratidzwawo muhana dzenyu.

¹²Hatizvirumbidzizve kwamuri, asi tinokupai nzira yokurumbidza nokuda kwedu, kuti mugone kupindura avo vanovimba nezvinoonekwa, vasingavimbi nezvomwoyo.

¹³Nokuti kana tichipenga, tinodaro nokuda kwaMwari; kana tiri vanhu kwavo, tinodaro nokuda kwenyu.

¹⁴Nokuti rudo rwaKristu runotimanikidza; zvatinoziva chinhu ichi kuti mumwe akafira vose, zvino vose vakafa;

¹⁵zvino iye akafira vose, kuti avo vanorarama varege kuzozviraramira ivo, asi uyo akafa nokumutswa nokuda kwavo.

¹⁶Naizvozvo kubvira zvino hatitongozivi munhu panyama; uye kunyange takaziva Kristu panyama, kubvira zvino hatichamuzivi saizvozvo.

¹⁷Saka kana munhu ari muna Kristu, ava chisikwa chitsva; zvinhu zvakare zvapfuura; tarirai, zvose zvava zvitsva.

¹⁸Asi zvinhu zvose zvakabva kuna Mwari, wakatiyananisa naye naKristu, akatipa kushumira kwokuyananisa;

¹⁹ndiko kuti Mwari akanga achiyananisa nyika naye muna Kristu, akasavaverengera kudarika kwavo, akatipa isu shoko rokuyananisa.

²⁰Naizvozvo tiri nhume nokuda kwaKristu, Mwari saanenge achikumbira zvikuru nesu; tinokumbira nokuda kwaKristu, tichiti, “Yananiswai naMwari.”

²¹Uyo, akanga asingazivi zvivi, akamuita kuti ave zvivi nokuda kwedu; kuti isu tive kururama kwaMwari maari.