Read Shona Union Version 2002 2 VAKORINDE 8 Bible Online

2 VAKORINDE 8 - Shona Union Version 2002 bible

2 VAKORINDE 8

¹Zvino tinokuzivisai, hama dzangu, nyasha dzaMwari dzakapiwa pakereke dzeMakedhonia;

²kuti pakati pokuedzwa kukuru kwokutambudzika, mufaro wavo mukuru, pamwechete nourombo hwavo hukuru, zvakawanza zvikuru kusanyima kwavo.

³Nokuti ndinopupura, kuti vakapa nokuda kwavo pavakagona napo, kunyange kupfuura pavakagona napo;

⁴vakakumbira nokunyengetera kukuru kwatiri kuti tivatendere kuita basa iri renyasha nokusangana pakushumira vatsvene;

⁵havana kuita sezvatakafunga bedzi, asi ivo vakatanga kuzvipa kuna ishe, nokwatiri, nokuda kwaMwari.

⁶Naizvozvo takakumbira zvikuru kuna Tito, kuti sezvaakanga atanga, apedzise basa iri renyasha pakati penyuwo.

⁷Zvino sezvamakapfuurira pazvinhu zvose, pakutenda, napakutaura, napakuziva, napakushingaira kwose, naparudo rwenyu kwatiri, tarirai kuti mupfuure pabasa iri renyashawo.

⁸Handirevi ndichirayira, asi kuti ndiedze ndizive nokushingaira kwavamwe kana rudo rwenyu ndorwachokwadiwo.

⁹Nokuti munoziva nyasha dzaIshe wedu, Jesu Kristu, kuti kunyange akanga akapfuma, akava murombo nokuda kwenyu, kuti imi nourombo hwake muve vapfumi.

¹⁰Pachinhu ichi ndinokuudzai kufunga kwangu; nokuti zvichakubatsirai, nokuti ndimi makatangira vamwe makei, musingaiti bedzi, asi muchidawo.

¹¹Asi zvino pedzisai kuitawo; sezvamakanga muno mwoyo unoda, saizvozvo pedzisaiwo pamunogona napo.

¹²Nokuti kana mwoyo wokupa uripo, chipo chinofadza paanapo, kusati kuri paanoshaiwa napo.

¹³Nokuti handirevi kudaro ndichiti vamwe varerukirwe, imi muremerwe; asi kuti muenzane;

¹⁴kuti panguva ino kuwanda kwenyu kubatsire kushayiwa kwavo, kuti kuwanda kwavo kubatsire kushayiwa kwenyuwo; kuti kuve nokuenzana;

¹⁵sezvazvakanyorwa, zvichinzi, “Wakaunganidza zvizhinji, haana kusarirwa nechinhu; naiye akaunganidza zvishoma, haana kushayiwa.”

¹⁶Zvino Mwari ngaavongwe, wakaisa mumwoyo maTito kushingaira kwakadaro kwamuri.

¹⁷Nokuti akanzwa hake kurayira kwedu, asi zvaakanga achishingaira zvikuru, akaenda kwamuri, nokuda kwake hake.

¹⁸Zvino takatuma pamwechete naye hama iya, ino rumbidzwa paVhangeri pakereke dzose;

¹⁹zvisati zviri izvozvo bedzi, asi iye akasanangurwawo nekereke kuti atiperekedze pabasa iri renyasha, rinoitwa nesu, kuti iye Mwari akudzwe;

²⁰tichizvichenjerera, kuti kurege kuva nomunhu angatipa mhosva pamusoro pezvakawanda izvi, zvatinobata nazvo.

²¹Nokuti hatitsvaki zvinhu zvakanaka pamberi paIshe bedzi, asi pamberi pavanhuwo.

²²Takatumawo navo hama yedu, yatakaedza kazhinji tikaona kuti anoshingaira pazvinhu zvizhinji; asi zvino anonyanya kushingaira nokuda kwokutenda kukuru kwaanako kwamuri.

²³Kana ari Tito, ndiye shamwari yangu, nomubatsiri wangu kwamuri; kana dziri hama dzedu, ndivo vapostori vekereke, uye kukudzwa kwaKristu.

²⁴Naizvozvo muvaratidze pamberi pekereke chiratidzo chorudo rwenyu, nechokurumbidza kwedu pamusoro penyu.