Read Shona Union Version 2002 VAGARATIYA 2 Bible Online

VAGARATIYA 2 - Shona Union Version 2002 bible

VAGARATIYA 2

¹Zvino, makore ane gumi namana akati apfuura, ndikakwirazve Jerusaremu naBhanabhasi, ndikaendawo naTitosi.

²Ndakakwira nokuda kwokuratidzwa; ndikarondedzera pamberi pavo Vhangeri yandinoparidza pakati pavahedheni, asi kuna vakanga vachikudzwa vari voga, kuti zvimwe ndirege kumhanyira pasina, kana kuti zvimwe ndatomhanyira pasina.

³Asi naTito, waiva neni, ari muGiriki, haana kurovererwa kuti adzingiswe;

⁴nokuda kwehama dzenhema, vakanga vapinzwa nokunyanga, vakanga vapinda pakavanda, kuti vashore kusununguka kwedu kwatinako muna Kristu Jesu, kuti vatisunge;

⁵hatina kuvatsedukira ivava, tichivateerera kunyangwe nguva imwechete; kuti chokwadi cheVhangeri chirambe chichigara nemi.

⁶Zvino kana vari ivo vanonzi vakuru handina mhaka kuti vaiva vakadini kare; Mwari haatendi zvinoonekwa zvomunhu kana vari ivo vanonzi vakuru, havana kundiwedzera chinhu;

⁷asi ivo vakati vaona kuti ini ndakapiwa Vhangeri kuna vasina kudzingiswa, saPetirosi kuna vakadzingiswa;

⁸nokuti iye akapa Petirosi simba rokuva mupostori kuna vakadzingiswa, ndiye akapawo ini simba rokuva mupostori kuvahedheni;

⁹vakati vaona nyasha dzandakanga ndapiwa, Jakobho, naKefasi, naJohani avo vainzi mbiru vakatibata isu tose naBhanabhasi namaoko orudyi okuyanana, kuti isu tiende kuvahedheni, ivo kuna vakadzingiswa;

¹⁰vakada chete kuti tirangarire varombo; ndizvo zvandakashingairirawo kuti ndizviite.

¹¹Zvino Kefasi akati asvika Andioki ndakamudzivisa pachena, nokuti akanga ane mhosva.

¹²Nokuti vamwe, vakanga vabva kuna Jakobho; asi vasati vasvika, iye aidya navahedheni asi vakati vasvika akadzoka, akazviraura, achitya vakadzingiswa.

¹³Navamwe vaJudha vakaita mano-manowo pamwechete naye; zvikaitwa kuti naiye Bhanabhasiwo akatsauswa namano-mano avo.

¹⁴Asi ndakati ndichiona kuti havafambi zvakarurama nechokwadi cheVhangeri, ndakati kunaKefasi pamberi pavose: “Kana iwe, uri muJudha, uchifamba savahedheni usingaiti savaJudha, unoreverera seiko vahedheni, kuti vafambe savaJudha?”

¹⁵Isu vaJudha pakuzvarwa kwedu, tisati tiri vatadzi vanobva kuvahedheni,

¹⁶zvatinoziva kuti munhu haaruramiswi namabasa omurayiro, asi nokutenda kuna Kristu Jesu, nesuo takatenda kuna Kristu Jesu, kuti tiruramiswe nokutenda kuna Kristu, tirege kururamiswa namabasa omurayiro; nokuti hakuna munhu acharuramiswa namabasa omurayiro.

¹⁷Zvino kana isu pakutsvaka kwekururamiswa muna Kristu, tikawanikwa tiri vatadziwo timene, ko Kristu wava mushumiri wezvivi here? Haisva!

¹⁸Nokuti kana ndikavakazve izvo zvandamboputsa, ndinozviita mudariki.

¹⁹Nokuti nomurayiro ini ndakafa kumurayiro, kuti ndirarame kuna Mwari.

²⁰Ndakaroverwa pamuchijikwa pamwechete naKristu; handichiri ini ndinorarama, asi Kristu anorarama mandiri; kurarama uku, kwandinorarama nako munyama zvino, ndinorarama nokutenda kuri muMwanakomana waMwari, akandida, akazvipa nokuda kwangu.

²¹Handikonesi nyasha dzaMwari; nokuti kana kururamiswa kuchibva kumurayiro, Kristu akafa pasina.