Read Shona Union Version 2002 VAGARATIYA 4 Bible Online

VAGARATIYA 4 - Shona Union Version 2002 bible

VAGARATIYA 4

¹Zvino ndinoti, mudyi wenhaka, kana achiri mwana, haatongosiyani nomuranda, kunyange ari ishe wazvose;

²asi ari pasi pavatariri navachengeti kusvikira panguva yakatarwa nababa.

³Saizvozvo nesuo, tichiri vana, takanga takasungwa pasi pezvokuvamba zvenyika;

⁴zvino nguva yakati yazara kwazvo, Mwari akatuma Mwanakomana wake, akaberekwa nomukadzi, akaberekwa pasi pomurayiro,

⁵kuti adzikinure vari pasi pomurayiro, kuti tipiwe umwana hwedu.

⁶Zvino zvamuri vanakomana, Mwari akatuma Mweya woMwanakomana wake mumwoyo medu unodana, achiti, “Aba, baba!”

⁷Saka iwe hauchiri muranda, asi mwanakomana, kana wava mwanakomana, wava mudyi wenhaka naMwari.

⁸Asi nenguva iyo, zvamakanga musingazivi Mwari, maiva varanda vavamwari vasati vari vezvokwadi;

⁹asi zvino, zvamunoziva Mwari, zvikuru zvamunozikanwa naMwari, modzokerazve seiko kunezvokuvamba zvisina simba, zvourombo, muchidazve kutanga kuva varanda vazvo?

¹⁰Munochengeta misi nemwedzi, nenguva namakore.

¹¹Ndinotya pamusoro penyu, kuti zvimwe ndakabata basa kwamuri pasina.

¹²Ndinokumbira kwamuri, hama dzangu, kuti muve seni, nokuti ini ndakaita semi. Hamuna kundiitira chinhu chimwe chisakarurama;

¹³zvino munoziva kuti ndakakuparidzirai Vhangeri pakutanga nokuda kwokurwara panyama;

¹⁴nechinhu icho panyama yangu, chakanga chiri muedzo kwamuri, hamuna kuchizvidza, kana kuchisema; asi makandigamuchira somutumwa waMwari, saiye Kristu Jesu.

¹⁵Zvino kufara kwenyu kuripiko? Nokuti ndinokupupurirai, kuti kana maigona, maitumbura meso enyu mukandipa iwo.

¹⁶Zvino ndava muvengi wenyu, zvandakakuudzai chokwadi here?

¹⁷Vanokushingairirai nomutoo usakanaka; asi vanoda kukupfigirai kunze, kuti imi muvashingairire.

¹⁸Zvino zvakanaka kuti pachinhu chakanaka kushingairirwe nguva dzose, zvirege kuitwa kana ndiri kwamuri bedzi.

¹⁹Vana vangu vaduku, vandinotamburirazve kubereka, kusvikira Kristu aumbwa mukati menyu.

²⁰Ndaida kuti ndive nemi zvino, ndishandure izwi rangu; nokuti ndinokanganiswa nokuda kwenyu.

²¹Ndiudzei, imi munoda kuva pasi pomurayiro, hamuteereri murayiro here?

²²Nokuti kwakanyorwa kuti Abhurahamu akanga ana vanakomana vaviri, mumwe womurandakadzi, mumwe womukadzi akasununguka.

²³Zvino womurandakadzi akaberekwa nenzira yenyama; asi womukadzi akasununguka akaberekwa sezvaakapikirwa.

²⁴Zvinhu izvi zvinofananidzira; nokuti vakadzi ava vaviri isungano mbiri; imwe inobva pagomo reSina, inobereka vana vouranda ndiye Agari;

²⁵zvino Agari ndiro gomo reSina muArabhia, rakaenzana neJerusaremu razvino; nokuti uri muuranda iye navana vake.

²⁶Zvino Jerusaremu riri kumusoro rakasununguka, ndivo mai vedu;

²⁷nokuti kwakanyorwa, kuchinzi, “Fara, iwe usingabereki, usingazvari, Pururudza, udanidzire, iwe usingatamburi nokubereka, Nokuti vana vomusiyiwa vazhinji kunowaiye ano murume.”

²⁸Zvino imi, hama dzangu, muri vana vokupikirwa saIsaka.

²⁹Asi sapanguva iyo, uyo wakaberekwa nenzira yenyama wakatambudza akaberekwa nenzira yoMweya, zvakadarowo nazvino.

³⁰Asi Rugwaro runotiiko? “Dzinga murandakadzi nomwanakomana wake; nokuti mwanakomana womurandakadzi haangadyi nhaka pamwechete nomwanakomana wowakasununguka.”

³¹Saka, hama dzangu, hatizi vana vomurandakadzi, asi vowakasununguka.