Read Shona Union Version 2002 VAGARATIYA 5 Bible Online

VAGARATIYA 5 - Shona Union Version 2002 bible

VAGARATIYA 5

¹Kristu akatisunungura kuti tive vakasununguka; naizvozvo mirai nesimba, murege kusungwazve nejoko rouranda.

²Tarirai, ini Pauro, ndinoti kwamuri, kana muchidzingiswa, Kristu haangakubatsiriyi chinhu.

³Ndinopupurira mumwe nomumwe anodzingiswa, kuti iye ane ngava rokuti achengete murayiro wose.

⁴Makaparadzaniswa naKristu, iyemi munoda kururamiswa nomurayiro; mabudiswa panyasha.

⁵Nokuti isu noMweya tinomirira nokutenda tariro yokururamiswa.

⁶Nokuti muna Kristu Jesu kudzingiswa kana kusadzingiswa hazvibatsiri chinhu; asi kutenda kunobata norudo.

⁷Makanga muchimhanya zvakanaka; ndianiko akakudzivisai kuti murege kuteerera chokwadi?

⁸Hamuna kugombedzerwa naiye akakudanai.

⁹“Mbiriso shoma inovirisa mukanyiwa wose.”

¹⁰Ndinotenda pamusoro penyu muna Ishe, kuti hamungatongorangariri chimwe chinhu; asi uyo, anokupesanisai achafanira hake kutongwa, kunyange ari ani naani.

¹¹Asi ini, hama dzangu, kana ndichiparidza kuti vanhu vadzingiswe, ndinoramba ndichitambudzwa neiko? Naizvozvo kugumbusa kwomuchinjikwa kwabviswa.

¹²Dai avo vanokupesanisai vachizvigadzirawo pachavo.

¹³Nokuti imi, hama dzangu, makadanirwa kusununguka; asi kusununguka kwenyu ngakurege kuva nzira yenyama, asi batiranai norudo.

¹⁴Nokuti murayiro wose unozadziswa neshoko rimwechete, rokuti, “Ida wokwako sezvaunozvida iwe;”

¹⁵asi kana muchirumana nokudyana, chenjerai kuti murege kupedzana.

¹⁶Zvino ndinoti: Fambai noMweya, ipapo hamungaiti kuchiva kwenyama.

¹⁷Nokuti nyama inochiva ichirwa noMweya; noMweya uchirwa nenyama; nokuti izvi zvinorwisana; kuti murege kuita zvamunoda.

¹⁸Asi kana muchitungamirirwa noMweya, hamuzi pasi pomurayiro.

¹⁹Zvino mabasa enyama anoonekwa, anoti: Upombwe, netsvina, nokukara

²⁰nokunamata zvifananidzo, nouroyi, nokuvengana, negakava, negodo, nokutsamwa, nokupesana, nokuparadzana, nedzidziso dzakatsauka,

²¹nokugodorana, nokuraradza, nokutamba kwakaipa, nezvinhu zvakadai; izvo zvandinokuudzai zvino, sezvandakambokuudzai kare, kuti vanoita zvakadai havangadyi nhaka youshe hwaMwari.

²²Zvino chibereko choMweya ndirwo rudo, norufaro, rugare, mwoyo murefu, mwoyo munyoro, kunaka, kutendeka,

²³unyoro, nokuzvidzora; hakuna murayiro unodzivisa zvinhu zvakadai.

²⁴Asi avo vari vaKristu Jesu vakarovera pamuchinjikwa nyama yavo, pamwechete nokuda kwayo, nokuchiva kwayo.

²⁵Kana tichirarama noMweya, ngatifambewo noMweya,

²⁶tirege kuzvikudza, tichimutsana mwoyo, tichigodorana.