Read Shona Union Version 2002 VAGARATIYA 6 Bible Online

VAGARATIYA 6 - Shona Union Version 2002 bible

VAGARATIYA 6

¹Hama dzangu, kunyange munhu akabatwa panokumwe kudarika, imi voMweya mudzose wakadai nomwoyo wounyoro; uchizvichenjerera iwe, kuti urege kuedzwawo.

²Takuriranai mitoro yenyu, mugozadzisa murayiro waKristu saizvozvo.

³Nokuti kana munhu achiti, ndiri chinhu, asati ari chinhu, anozvinyengera iye.

⁴Zvino munhu mumwe nomumwe ngaaedze basa rake amene, ipapo angazvirumbidza pamusoro pake iye amene oga, asingazviiti pamusoro pomumwe.

⁵Nokuti munhu mumwe nomumwe achafanira kutakura mutoro wake.

⁶Zvino anodzidziswa Shoko, ngaagovane noanodzidzisa pazvinhu zvose zvakanaka.

⁷Musanyengerwa; Mwari haasekwi; nokuti izvo zvinodyarwa nomunhu, ndizvo zvaanochekazve.

⁸Nokuti anodyarira nyama yake, achacheka kuora, kunobva panyama; asi anodyarira Mweya, achacheka upenyu husingaperi, hunobva kuMweya.

⁹Zvino ngatirege kuneta pakuita zvakanaka; nokuti tinozocheka nenguva yakafanira, kana tisingaori mwoyo.

¹⁰Zvino zvatine nguva, ngatiitire vose zvakanaka, zvikuru kuna veimba yokutenda.

¹¹Tarirai, kukura kwamabhii andinokunyorerai nawo noruoko rwangu.

¹²Vose vanoda kunzi vakanaka pane zvinoonekwa panyama, ndivo vanokurovererai kuti mudzingiswe; vanodaro bedzi kuti varege kutambudzwa nokuda kwomuchinjikwa waKristu.

¹³Nokuti kunyange vakadzingiswa, havachengeti murayiro vamene; asi vanoda kuti imi mudzingiswe, kuti vazvirumbidze panyama yenyu.

¹⁴Asi kana ndirini, ngandirege kutongozvirumbidza napaduku, asi bedzi mumuchinjikwa waIshe wedu, Jesu Kristu; naye nyika yakaroverwa pamuchinjikwa kwandiri, neni ndakaroverwa kunyika.

¹⁵Nokuti kudzingiswa kana kusadzingiswa hachizi chinhu, asi chisikwa chitsva.

¹⁶Vose vanofamba nomurayiro uyu, rugare ngaruve pamusoro pavo, nenyasha, napamusoro pavaIsiraeri vaMwari.

¹⁷Kubvira zvino ngakurege kuva nomunhu anonditambudza; nokuti ndina mavanga aJesu pamuviri wangu.

¹⁸Nyasha dzaIshe wedu Jesu Kristu, ngadzive nomweya wenyu, hama dzangu. Ameni.