Read Shona Union Version 2002 VAEFESO 1 Bible Online

VAEFESO 1 - Shona Union Version 2002 bible

VAEFESO 1

¹Pauro, mupostori waKristu Jesu, nokuda kwaMwari, kuvatsvene vari paEfeso, nokuna vanotenda muna Kristu Jesu:

²Nyasha ngadzive nemi, norugare runobva kuna Mwari; baba vedu, naIshe Jesu Kristu.

³Ngaavongwe Mwari naBaba vaIshe wedu Jesu Kristu, akatiropafadza nokuropafadza kwose kwoMweya, kudenga muna Kristu,

⁴sezvaakatitsanangura maari nyika isati yavambwa, kuti tive vatsvene, vasina mhosva, pamberi pake murudo;

⁵akatitemera kare, kuti naJesu Kristu tiitwe vanakomana vake, sezvaakafadzwa pakuda kwake,

⁶kuti kunaka kukuru kwenyasha dzake dzakangotipa hake muMudikanwi wake, kurumbidzwe;

⁷uyo watine dzikinuro maari neropa rake, iko kukanganwirwa kwokudarika kwedu, nokuwanda kwenyasha dzake;

⁸dzakawanza kwatiri nokuchenjera kwose nokuziva;

⁹akatizivisa zvakavanzika zvokuda kwake, sezvaakafadzwa pakufunga kwake maari;

¹⁰kuti afambise kuzara kwenguva, aunganidzwe muna Kristu zvose zviri kudenga, nezviri pasi;

¹¹muna iye, watakaitwawo nhaka maari, yatakatemerwa kare nokurayira kwaiye, anoita zvose nokufunga kwokuda kwake;

¹²kuti tirumbidze kubwinya kwake, isu takatarira kare muna Kristu;

¹³muna iye, nemiwo, makanzwa shoko rechokwadi maari, iyo Vhangeri yokuponeswa kwenyu; muna iye, wamakatenda kwaari, mukaisirwa chisimbiso noMweya Mutsvene wamakapikirwa;

¹⁴uri rubato rwenhaka yedu, kuratidza kudzikinurwa kwavanhu vaMwari chaivo, kuti kubwinya kwake kurumbidzwe.

¹⁵Saka neniwo, ndakati ndanzwa kutenda muna Ishe Jesu kuri pakati penyu, norudo kuvatsvene vose,

¹⁶handiregi kuvonga pamusoro penyu, ndichikurangarirai paminyengetero yangu;

¹⁷kuti Mwari waIshe wedu Jesu Kristu, Baba vokubwinya kukuru, akupei mweya wokuchenjera nowokuzarurirwa pakumuziva;

¹⁸mavhenekerwa meso omwoyo wenyu, kuti muzive kuti kudana kwake kune tariro yei, nepfuma yokubwinya kwenhaka yake pakati pavatsvene,

¹⁹noukuru hwakapfuurisa hwesimba rake kwatiri isu tinotenda, nokubata kwesimba rake guru,

²⁰raakabata muna Kristu, achimumutsa kuvakafa, nokumugarisa kurudyi rwake kudenga,

²¹kumusoro-soro kwamadzishe ose, noukuru, nesimba, noushe, namazita ose anorehwa, pasati pari panyika ino bedzi, asi pane inozouyawo;

²²akaisa zvose pasi petsoka dzake, akapa sangano iye, kuti ave musoro wazvose,

²³ndiwo muviri wake kuzara kwaiye anozadzisa zvose muna vose.