Read Shona Union Version 2002 VAEFESO 2 Bible Online

VAEFESO 2 - Shona Union Version 2002 bible

VAEFESO 2

¹Akakuraramisai imi, makanga makafa nokudarika kwenyu nezvivi zvenyu,

²izvo zvamaifamba mukati mazvo kare, netsika dzenyika ino, nenzira dzomuchinda wesimba redenga, dzomweya anobata zvino muvana vokusateerera;

³vataifamba tose pakati pavo kare, mukuchiva kwenyama yedu, tichiita kuda kwenyama nokwokufunga kwedu, nopakuzvarwa kwedu isu navamwe vose taiva vana vokutsamwirwa.

⁴Zvino Mwari ane nyasha zhinji-zhinji, nokuda kworudo rwake rukuru, rwaakatida narwo,

⁵kunyange takanga takafa mukudarika kwedu, akatiraramisa pamwechete naKristu makaponeswa nenyasha;

⁶akatimutsa pamwechete naye, akatigarisa kudenga pamwechete naye muna Kristu Jesu;

⁷kuti nenguva dzinouya aratidze pfuma huru-huru yenyasha dzake paunyoro hwake kwatiri muna Kristu Jesu;

⁸nokuti makaponeswa nenyasha, nokutenda; izvo zvisingabvi kwamuri, asi chipo chaMwari;

⁹hazvibvi pamabasa, kuti kurege kuva nomunhu anozvikudza.

¹⁰Nokuti tiri basa rake, takasikwa kuti muna Kristu Jesu tiite mabasa akanaka, akagadzirwa kare naMwari kuti tifambe maari.

¹¹Naizvozvo rangarirai, kuti imi vahedheni munyama, mainzi “Vasina, kudzingiswa” naivo vanonzi, “Vokudzingiswa,” kuri munyama, kunoitwa namaoko;

¹²kuti nenguva iyo makanga musina Kristu, muri vatorwa paushe hwavaIsiraeri, muri vaeni pasungano dzechipikirwa, musina tariro, musina Mwari panyika.

¹³Asi zvino muna Kristu Jesu imi, makanga muri kure kare, makaswededzwa muropa raKristu.

¹⁴Nokuti ndiye rugare rwedu, iye akaita zvinhu zviviri kuti chive chinhu chimwe, akaputsa rusvingo rwapakati rwaiparadzanisa;

¹⁵zvaakaparadza munyama yake kuvengana, iwo murayiro wezvakarayirwa pazvirevo; kuti asike ava vaviri vave munhu mutsva maari, aite rugare saizvozvo;

¹⁶kuti mumuchinjikwa ayananisezve vose vaviri, vave muviri mumwe kuna Mwari, zvaakauraya kuvengana naiwo muchinjikwa;

¹⁷akasvika, akaparidza rugare kwamuri, imi maiva kure, norugare kuna ivo vaiva pedyo;

¹⁸nokuti isu tose tinopinda naiye noMweya mumwe kuna Baba.

¹⁹Naizvozvo, hamuzati muchiri vaeni navatorwa, asi matova pamwechete navatsvene, neveimba yaMwari.

²⁰Makavakwa pamusoro penheyo dzavapostori navaporofita, Kristu Jesu amene ari ibwe rapakona.

²¹Maari imba yose yakasanganiswa kwazvo, inokura, ive temberi tsvene muna Ishe.

²²Maari nemiwo makavakwa pamwechete, kuti muve ugaro hwaMwari muMweya.