Read Shona Union Version 2002 VAEFESO 3 Bible Online

VAEFESO 3 - Shona Union Version 2002 bible

VAEFESO 3

¹Nemhaka iyi, ini Pauro, ndiri musungwa waKristu Jesu nokuda kwenyu, imi vahedheni,

²kana makanzwa henyu kugoverwa kwenyasha dzaMwari dzandakapiwa pamusoro penyu;

³kuti zvakanga zvakavanzika zvakandizivisa pakuzarurirwa, sezvandakambokunyorerai namashoko mashoma;

⁴kana muchiarava iwo, mungaona kuziva kwangu pane zvakavanzika zvaKristu;

⁵zvakanga zvisina kuziviswa vanakomana vavanhu pane dzimwe nguva, sezvazvakazarurirwa vapostori vatsvene, navaporofita zvino muMweya;

⁶zvokuti: Vahedheni, vadyi venhaka pamwechete nesu, nemitezo yomuviri pamwechete nesu, vakagoverwawo pamwechete nesu chipikirwa muna Kristu Jesu neVhangeri;

⁷yandakaitwa mushandiri wayo nechipo chenyasha dzaMwari, chandakapiwa nokushanda kwesimba rake.

⁸Ini, muduku kwazvo kuvatsvene vose, ndakapiwa nyasha idzi, kuti ndiparidzire vahedheni pfuma isinganzverwi yaKristu,

⁹nokuratidza vose kuti kugoverwa kwakadiniko kwezvakavanzika, zvakanga zvakafukidzwa muna Mwari, akasika zvose, kubva panguva yokutanga;

¹⁰kuti zvino madzishe navane simba kudenga vaziviswe nesungano kuchenjera kukuru kwaMwari;

¹¹sechirevo chokutanga-tanga chaakatema muna Kristu Jesu, Ishe wedu;

¹²maari tinokutsunga kwedu nokupinda kwedu tisingatyi, nokutenda kwake.

¹³Saka ndinokumbira kuti murege kupera mwoyo nokutambudzika kwangu pamusoro penyu; ndiko kukudzwa kwenyu.

¹⁴Nemhaka iyi ndinopfugama namabvi angu kuna Baba,

¹⁵rudzi rwose kudenga napanyika runotumidzwa nezita ravo,

¹⁶kuti vakupei papfuma yokubwinya kwavo kukuru, simba kuti musimbiswe noMweya wavo mumunhu womukati;

¹⁷kuti Kristu agare mumwoyo yenyu nokutenda; kuti imi, mune midzi yenyu nenheyo dzenyu murudo;

¹⁸muve nesimba rokunzwisisa pamwechete navatsvene vose, kuti kufara, nokureba, nokukwirira, nokudzika kwakadiniko,

¹⁹nokuziva rudo rwaKristu, runopfuura kuziva, kuti muzadziswe nokuzara kwose kwaMwari.

²⁰Zvino, iye ane simba rokuita zvikuru kwazvo zvinopfuura zvose zvatinokumbira kana zvatinofunga, nesimba rinobata mukati medu,

²¹ngaave nokubwinya musangano muna Kristu Jesu, kusvikira kumarudzi ose nokusingaperi-peri, Ameni.