Read Shona Union Version 2002 VAEFESO 4 Bible Online

VAEFESO 4 - Shona Union Version 2002 bible

VAEFESO 4

¹Naizvozvo ini musungwa muna Ishe, ndinokumbira zvikuru kuti mufambe zvakafanira kudanwa kwamakadanwa nako,

²nokuzvininipisa kwose nounyoro, nomwoyo murefu, muchiitirana mwoyo murefu murudo;

³muchishingaira kuchengeta umwe hwoMweya muchisungo chorugare.

⁴Kuno muviri mumwe, noMweya mumwe, sezvamakadanwawo mutariro imwe yokudanwa kwenyu;

⁵Ishe mumwe, nokutenda kumwe; norubhabhatidzo rumwe,

⁶naMwari mumwe, naBaba vavose, ari pamusoro pavose, anoshanda muna vose, ari mukati mavose.

⁷Asi mumwe nomumwe wedu akapiwa nyasha nechiyero chechipo chaKristu.

⁸Naizvozvo anoti, “Akakwira kumusoro akatapa vatapwa, Akapa vanhu zvipo.”

⁹Zvino kuti, “Akakwira, chinyiko,” asi kuti, akaburukawo kumativi ari pasi penyika?

¹⁰Akaburuka ndiye akakwirawo kumusoro-soro kwedenga rose, kuti azadzise zvose.

¹¹Zvino akapa vamwe kuti vave vapostori, vamwe vaporofita, vamwe vaparidzi, vamwe vafudzi navadzidzisi;

¹²kuti vatsvene vakwanisirwe basa ravo rokushumira, nerokuvaka muviri waKristu;

¹³kudzamara isu tose tisvike paumwe hwokutenda nokuziva Mwanakomana waMwari, napamunhu wakura, napachiyero choukuru hokuzara kwaKristu;

¹⁴kuti tirege kuramba tichingova vacheche, tichizununguswa nokudzingwa nemhepo ipi neipi yokudzidzisa nokunyengera kwavanhu, namano, kuti vatsause nokunyengera;

¹⁵asi tireve chokwadi murudo, tigokura maari pazvose, iye Kristu, Musoro;

¹⁶muviri wose wakasanganiswa zvakanaka maari nokubatanidzwa nenhengo dzose dzinosimbisa, mutezo mumwe nomumwe uchibata basa nechiyero chawo kuti muviri ukuriswe pakuvakwa kwawo murudo.

¹⁷Naizvozvo ndinoreva nokupupura chinhu ichi muna Ishe, ndichiti, musaramba muchifamba savahedheni, vanofambawo noupenzi hwokurangarira kwavo,

¹⁸vakasvibirwa pakunzwisisa kwavo, vari vatorwa paupenyu hwaMwari nokuda kwokusaziva kuri mukati mavo nokuda kwoukukutu hwomwoyo yavo;

¹⁹vakazvipa vasina hanya kuutere, kuti vabate mabasa ose etsvina nookuchiva.

²⁰Asi imi hamuna kudzidza Kristu saizvozvo,

²¹kana ari iye hake wamakanzwa, nokudzidziswa maari, seiri chokwadi muna Jesu:

²²kuti pamufambiro wenyu wokutanga mubvise munhu wekare; unoodzwa nokuchiva kwokunyengetera;

²³muvandudzwe mumweya wokurangarira kwenyu,

²⁴mupfeke munhu mutsva, akasikwa akafanana naMwari pakururama, noutsvene hwechokwadi.

²⁵Naizvozvo bvisai nhema, mutaure chokwadi, mumwe nomumwe kunowokwake; nokuti tiri mitezo, mumwe womumwe.

²⁶Tsamwai, musingatadzi; zuva ngarirege kuvira muchakatsamwa;

²⁷musapa Dhiabhori nzvimbo.

²⁸Akaba, ngaarege kubazve; asi zviri nani kuti atambudzike abate namaoko ake basa rakanaka, kuti ave nechaangapa anoshaiwa.

²⁹Mumuromo menyu murege kubuda shoko rakaora, asi rakanaka, ringasimbisa pakafanira, rivigire nyasha avo vanonzwa.

³⁰Regai kuchemedza Mweya Mutsvene waMwari, wamakaisirwa chisimbiso maari kusvikira pazuva rokudzikinurwa.

³¹Shungu dzose, nokutsamwa, nehasha, nokupopota, nokutuka, nezvakaipa zvose, ngazvibviswe kwamuri;

³²muitirane mwoyo munyoro, munzwirane tsitsi, mukanganwirane, sezvamakakanganwirwa naMwari muna Kristu.