Read Shona Union Version 2002 VAEFESO 5 Bible Online

VAEFESO 5 - Shona Union Version 2002 bible

VAEFESO 5

¹Naizvozvo ivai vateveri vaMwari savana vanodikanwa;

²fambai murudo, Kristu sezvaakakudaiwo, akazvipa nokuda kwedu, kuti ave chipo nechibayiro kuna Mwari, zviite hwema hunonhuwira.

³Asi upombwe, netsvina yose, kana kuchiva, ngazvirege kurehwa pakati penyu, sezvinofanira vatsvene;

⁴nezvakaipa, nokutaura zvoupenzi, nokunemera, izvo zvisina kufanira; asi zviri nani kuvonga.

⁵Nokuti munoziva kwazvo, kuti hakuna mhombwe, kana munhu une tsvina, kana anochiva, ndiye anonamata zvifananidzo, angadya nhaka muushe hwaKristu naMwari.

⁶Ngakurege kuva nomunhu anokunyengerai namashoko asina maturo; nokuti nemhaka yezvinhu izvi kutsamwa kwaMwari kunouya pamusoro pavanakomana vokusateerera.

⁷Naizvozvo regai kushamwaridzana navo;

⁸nokuti kare maiva rima, asi zvino muri chiedza muna Ishe; fambai savana vechiedza.

⁹Nokuti chibereko chechiedza chiri mukunaka kwose, nokururama, nechokwadi,

¹⁰muchiedza muzive zvinofadza Ishe.

¹¹Regai kuyanana namabasa erima asina zvibereko, asi zviri nani kuti muarayire;

¹²nokuti izvo, zvinoitwa navo pakavanda, zvinonyadza kana zvichirehwa.

¹³Asi zvinhu zvose, kana zvarayirwa, zvinoratidzwa, chava chiedza.

¹⁴Saka iye anoti, “Muka iwe uvete, muka kuvakafa, Kristu achakuvhenekera.”

¹⁵Naizvozvo chenjerai kwazvo pakufamba kwenyu, kuti murege kufamba savasina kuchenjera asi savakachenjera;

¹⁶mungwarire nguva yenyu, nokuti mazuva akaipa.

¹⁷Saka musava mapenzi, asi muzive kuda kwaIshe.

¹⁸Regai kudhakwa newaini, nokuti ndipo panokusazvidzora, asi muzadzwe noMweya;

¹⁹mutaurirane pakati penyu namapisarema, nenziyo, nezviimbo zvoMweya, muimbire, muridzire Ishe mumwoyo yenyu;

²⁰muchivonga Mwari, Baba, nguva dzose pamusoro pezvinhu zvose, muzita raIshe wedu, Jesu Kristu;

²¹muchizviisa mumwe pasi pomumwe, muchitya Kristu.

²²Imi vakadzi, muzviise pasi pavarume venyu chaivo, sezvamunoita kuna Ishe.

²³Nokuti murume musoro womukadzi, saKristuwo musoro wesangano; iye amene ndiye muponesi womuviri.

²⁴Asi sangano sezvariri pasi paKristu, vakadzi ngavadaro pazvinhu zvose kuvarume vavo.

²⁵Imi varume, idai vakadzi venyu, Kristu sezvaakadawo sangano, akazvipa nokuda kwaro;

²⁶kuti ariite dzvene achirinatsa nokushambidza nemvura neshoko,

²⁷kuti azviisire pamberi pake sangano, rinobwinya, risina gwapa, kana kuonyana, kana chinhu chakadai; asi rive dzvene, risina mhosva.

²⁸Saizvozvowo varume vanofanira kuda vakadzi vavo semiviri yavo. Anoda mukadzi wake, anozvida;

²⁹nokuti hakuna munhu akatongovenga nyama yake; asi anoipa zvokudya nokuichengeta, Kristu sezvaanoitira sangano;

³⁰nokuti isu tiri mitezo yomuviri wake.

³¹Naizvozvo munhu achasiya baba vake namai vake, anamatire mukadzi wake; ivavo vaviri vachava nyama imwe.

³²Chakavanzika ichi, chikuru; asi ndinotaura zvaKristu nezvesangano.

³³Asi imiwo, mumwe nomumwe ngaade mukadzi wake sezvaanozvida iye; nomukadzi ngaatye murume wake