Read Shona Union Version 2002 VAEFESO 6 Bible Online

VAEFESO 6 - Shona Union Version 2002 bible

VAEFESO 6

¹Imi vana, teererai vabereki venyu muna Ishe; nokuti ndizvo zvakarurama.

²Kudza baba vako namai ndiwo murayiro wokutanga une chipikirwa

³kuti uitirwe zvakanaka, ugare nguva refu panyika.

⁴Nemi madzibaba, regai kutsamwisa vana venyu; asi varerei pakuranga nokurayira kwaIshe.

⁵Imi varanda, teererai avo vari vatenzi venyu panyama, nokutya nokudedera, nemwoyo yakarurama, muchizviita sokuna Kristu;

⁶musingabati basa kana muchionekwa bedzi, savafadzi vavanhu, asi savaranda vaKristu, vanoita kuda kwaMwari nomwoyo wose;

⁷muchibata basa nomwoyo wakanaka, muchizviita sokuna Ishe, musingaitiri vanhu;

⁸muchiziva kuti chinhu chipi nechipi chakanaka, chinoitwa nomunhu mumwe nomumwe, achapiwazve naIshe, kana akasungwa kana akasununguka.

⁹Nemi madzishe, muvaitire saizvozvo, murege kuvatyisa; nokuti munoziva kuti Ishe wavo nowenyu ari kudenga; haatendi zvinoonekwa zvomunhu.

¹⁰Pakupedzisira ivai nesimba muna Ishe, nomusimba rake guru.

¹¹Shongai nhumbi dzose dzokurwa nadzo dzaMwari, mugone kumira muchirwa namano aDhiabhori.

¹²Nokuti hatirwi nenyama neropa, asi navabati, navane simba, namadzishe enyika erima rino, nemweya yakaipa yedenga.

¹³Saka torai nhumbi dzose dzokurwa nadzo dzaMwari, kuti mugone kudzivisa pazuva rakaipa, nokuramba mumire mapedza zvose.

¹⁴Naizvozvo mirai makasunga zviuno zvenyu nechokwadi, makapfeka chidzitiro chechipfuva chokururama,

¹⁵makasunga patsoka dzenyu kugadzirwa kweVhangeri yorugare;

¹⁶pamusoro paizvozvi makatora nhoo huru yokutenda, yamungagona kudzima nayo miseve yose yomoto yowakaipa.

¹⁷Torai ngowani yoruponeso, nomunondo woMweya, iro shoko raMwari;

¹⁸munyengetere nguva dzose nokunyengetera kwose nokukumbira muMweya, muchirinda pazvinhu izvi nokutsunga kwose nokukumbirira vatsvene vose,

¹⁹neniwo, kuti ndipiwe shoko kuti ndidudzire ndisingatyi zvakavanzika zveVhangeri,

²⁰yandiri nhume yayo yakasungwa nengetani; kuti ndizvitaure ndisingatyi, sezvandinofanira kutaura.

²¹Zvino kuti muzivewo zvangu, kuti ndakadiniko, Tikiko, hama inodikanwa, nomushumiri akatendeka muna Ishe, uchakuzivisai zvose;

²²ndakamutuwa kwamuri neshoko iri, kuti muzive zvinhu zvedu, anyaradze mwoyo yenyu.

²³Rugare ngaruve nehama, norudo pamwechete nokutenda, zvinobva kuna Mwari, Baba, naIshe Jesu Kristu.

²⁴Nyasha ngadzive navose vanoda Ishe wedu, Jesu Kristu, norudo rusingaori.