Read Shona Union Version 2002 VAFIRIPI 2 Bible Online

VAFIRIPI 2 - Shona Union Version 2002 bible

VAFIRIPI 2

¹Zvino kana kuvaraidzwa kuripo kuna Kristu, kana kunyaradza kworudo, kana kuyanana kwoMweya, kana mwoyo munyoro nokunzwira tsitsi,

²zadzisai mufaro wangu, muve nokufunga kumwe, muchiva norudo rumwe, nomweya mumwe, nendangariro imwe,

³musingaiti chinhu nenharo, kana nokuzvikudza, asi mumwe nomumwe ngaati nomwoyo unozvininipisa, vamwe vanomupfuura iye pakunaka;

⁴mumwe nomumwe ngaarege kutarira zvake, asi ngaatarire vamwewo.

⁵Ivai nomwoyo uyo, wakanga uri muna Kristu Jesuo;

⁶iye, kunyange akanga akafanana naMwari, haana kuti kuenzana naMwari ndochinhu chinofanira kubatisiswa;

⁷asi wakazvidurura iye, akazviita muranda, akafanana navanhu;

⁸akati awanikwa nomufananidzo womunhu, akazvininipisa, akateerera kusvikira parufu, irwo rufu rwomuchinjikwa.

⁹Saka Mwari akamukudza zvikuru, akamupa zita rinopfuura mazita ose;

¹⁰kuti muzita raJesu mabvi ose apfugame, avari kudenga navari panyika, navari pasi penyika,

¹¹kuti ndimi dzose dzibvumire dziti, Jesu Kristu ndiye Ishe, kuti Mwari, Baba, arumbidzwe.

¹²Naizvozvo, vadikanwi vangu, sezvamakateerera nguva dzose, ndisati ndiripo bedzi, asi zvikuru zvino kana ndisipo, pedzisai kuponeswa kwenyu nokutya nokudedera;

¹³nokuti ndiye Mwari anoita mukati menyu kuda nokuita nokuda kwake kwakanaka.

¹⁴Itai zvose musinganyunyuti musina nharo;

¹⁵kuti muve vanhu vasina chavangapomerwa, navasina kusarurama, vana vaMwari vasina mhosva pakati porudzi rwakakombama, rwakatsauka, rwamunoonekwa pakati parwo sezviedza panyika;

¹⁶makabatisisa shoko roupenyu, kuti ndive nechandingazvirumbidza nacho nezuva raKristu, ndizive kuti handina kumhanya pasina, kana kubata basa pasina.

¹⁷Kunyange ndikadururwa pamusoro pechibayiro nokushumira kwokutenda kwenyu, ndinofara nokufarisisa nemi mose.

¹⁸Nokuda kwaizvozvo nemiwo mufare nokufarisisa neni.

¹⁹MunaIshe Jesu ndinoti ndichakurumidza kutuma Timoti kwamuri, kuti neni ndifare kana ndanzwa zvenyu.

²⁰Nokuti handina mumwe munhu anomwoyo wakaita sowake, achava nehanya kwazvo nezvenyu.

²¹Nokuti vose vanozvitsvakira zvavo, zvisati zviri zvaKristu Jesu.

²²Asi munoziva kutendeka kwake, kuti akabata pamwechete neni paVhangeri, somwana anobatira baba vake.

²³Zvino ndiye wandinoti ndichatuma kwamuri pakarepo, kana ndaona kuti zvangu zvakadini;

²⁴asi ndinotenda muna Ishe kuti neniwo ndimene ndichakurumidza kuuya.

²⁵Asi ndakati ndinofanira kutuma kwamuri Epafirodhito, hama yangu, nomubatsiri wangu pamabasa napakurwa, nhume yenyu nomushumiri wangu pakushayiwa kwangu;

²⁶zvaakanga achikushuvai zvikuru imi mose, akatambudzika kwazvo, nokuti imi makanga manzwa kuti anorwara.

²⁷Nokuti akanga achirwara kwazvo, ari pakufa; asi Mwari wakamunzwira tsitsi; asati ari iye bedzi, asi neniwo, kuti ini ndirege kuwedzerwa nhamo pamusoro penhamo.

²⁸Naizvozvo ndakashingaira kumutuma kwamuri, kuti mumuone, mufarezve, neni ndirege kuva nenhamo.

²⁹Naizvozvo mumugamuchire muna Ishe nomufaro wose, uye mukudze vakadai;

³⁰nokuti nokuda kwebasa raKristu akanga oda kufa, akasarangarira upenyu hwake, achida kukwanisa pamakanga musingagoni kundishumira imi.