Read Shona Union Version 2002 VAFIRIPI 4 Bible Online

VAFIRIPI 4 - Shona Union Version 2002 bible

VAFIRIPI 4

¹Naizvozvo, hama dzangu, vadikanwi vandinoshuva kwazvo, mufaro wangu, nekorona yangu, mirai nesimba saizvozvo muna Ishe, vadikanwi.

²Ndinokumbira zvikuru Yuodhia, ndinokumbira zvikuru Sinitike, kuti vave nomwoyo mumwe muna Ishe.

³Hongu, newewo, shamwari yangu yazvokwadi pabasa, ndinokumbira kwauri kuti ubatsire vanhukadzi ava, nokuti vakabatirana neni paVhangeri, pamwechete naKiremenzi, navamwe vakabata basa pamwechete neni, mazita avo ari mubhuku youpenyu.

⁴Farai muna Ishe nguva dzose; ndichapamhidzazve: Farai.

⁵Unyoro hwenyu ngahuzikanwe navanhu vose. Ishe ari pedyo.

⁶Musafunganya pamusoro pechinhu; asi pazvinhu zvose, mikumbiro yenyu ngaiziviswe Mwari nokunyengetera nokukumbira, pamwechete nokuvonga.

⁷Zvino rugare rwaMwari runopfuura kunzwisisa kwose, rucharinda mwoyo yenyu nemifungo yenyu muna Kristu Jesu.

⁸Pakupedzisira, hama dzangu, zvose zvechokwadi, zvose zvinokudzwa, zvose zvakarurama, zvose zvakachena, zvose zvinodikanwa, zvose zvinorumbidzwa, kana kunaka kupi nokupi, kana chingarumbidzwe chipi nechipi, fungisisai izvozvo.

⁹Zvinhu izvo zvamakadzidza, nezvamakapiwa, nezvamakanzwa, nezvamakaona kwandiri, itai izvozvo; Mwari worugare ngaave nemi.

¹⁰Ndakafara zvikuru muna Ishe, nokuti zvino makapepukazve mukandirangarira; makanga marangarira henyu, asi makashayiwa nguva.

¹¹Handirevi izvozvi nokuti ndinoshayiwa; nokuti ini ndakadzidza kutenda nezvose zvandinazvo.

¹²Ndinoziva urombo, ndinozivawo kuva nezvakawanda; pachinhu chipi nechipi napazvinhu zvose ndakadzidziswa kuti ndizive kuguta nokunzwa nzara, kuva nezvizhinji nokushayiwa.

¹³Ndingaita zvose naiye anondipa simba.

¹⁴Kunyange zvakadaro, makaita zvakanaka zvamakasangana neni pakutambudzika kwangu.

¹⁵Munozivawo, imi vaFiripi, kuti pakutanga kweVhangeri, ndichibva Makedhonia, pakanga pasina sangano rimwe rakasangana neni pashoko rokupa nokugamuchira, asi imi moga;

¹⁶nokuti napaTesaronika makanditumira kamwe, norwechipirizve, pakushayiwa kwangu.

¹⁷Handirevi kudaro kuti nditsvake chipo, asi ndinotsvaka chibereko chamunozofumiswa nacho.

¹⁸Zvino ndava nezvose, ndapfumiswa; ndaguta, ndagamuchira kuna Epafirodhito izvo, zvinobva kwamuri, zvakaita sohwema hunonhuwira, nechibayiro chakafanira, chinofadza Mwari.

¹⁹Zvino Mwari wangu achazadzisa kushayiwa kwenyu kwose papfuma yake, mukubwinya, muna Kristu Jesu.

²⁰Zvino Mwari, baba vedu, ngaave nokubwinya nokusingaperi-peri. Ameni.

²¹Ndikwazisirei mutsvene mumwe nomumwe muna Kristu Jesu. Hama dzineni dzinokukwazisai.

²²Vatsvene vose vanokukwazisai, zvikuru avo veimba yaKesari.

²³Nyasha dzaIshe Jesu Kristu ngadzive nomweya wenyu.