Read Shona Union Version 2002 VAKOROSE 3 Bible Online

VAKOROSE 3 - Shona Union Version 2002 bible

VAKOROSE 3

¹Naizvozvo, kana makamutswa pamwechete naKristu, tsvakai zviri kumusoro, uko kuna Kristu, agere kurudyi rwaMwari.

²Fungai zviri kumusoro, musafunga zviri pasi.

³Nokuti makafa, upenyu hwenyu hwakavigwa pamwechete naKristu muna Mwari.

⁴Kana Kristu, iye upenyu hwedu, achionekwa, nemiwo muchaonekwa pamwechete naye pakubwinya.

⁵Naizvozvo urayai mitezo yenyu iri panyika, inoti: Upombwe, netsvina, nokushumba, nokuda zvakaipa, nokuchiva, ndiko kunamata zvifananidzo.

⁶Nokuda kwaizvozvi kutsamwa kwaMwari kunouya pamusoro pavana vokusateerera;

⁷nemiwo maifamba mazviri kare, maigara muzvinhu izvi.

⁸Asi zvino, imiwo, bvisai izvi zvose, zvinoti: Hasha, nokutsamwa, nokuvenga, nokutuka, nokutaura zvinonyadzisa nomuromo wenyu.

⁹Regai kureverana nhema, zvamakabvisa munhu wekare namabasa ake,

¹⁰mukafuka munhu mutsva, anovandudzwa pakuziva, afanane nowakamusika;

¹¹apo hapana muGiriki nomuJudha, akadzingiswa kana kusadzingiswa, mutorwa nomuSitia, musungwa nowakasununguka; asi Kristu ndiye zvose uye uri muna vose.

¹²Naizvozvo, savatsanangurwa vaMwari, vatsvene navanodikanwa, fukai mwoyo une tsitsi, nomwoyo munyoro, nokusazvikudza, nounyoro, nomwoyo murefu;

¹³muitirane mwoyo murefu, muchikanganwirana, kana munhu ane mhosva nomumwe; Ishe sezvaakakukanganwirai, muite saizvozvo nemiwo.

¹⁴Zvino pamusoro pezvinhu izvi zvose fukai rudo, ndicho chisungo chinokwanisa.

¹⁵Norugare rwaKristu ngaruteme zvirevo mumwoyo yenyu, ndirwo rwamakadanirwawo mumuviri mumwe; ivai nokuvonga.

¹⁶Shoko raKristu ngarigare mukati menyu riwande; nokuchenjera kwose mudzidzisane, nokurayirana namapisarema, nenziyo, nezviimbo zvomweya, muimbire Mwari nenyasha mumwoyo menyu;

¹⁷uye zvose zvamunoita, kana zviri zveshoko kana basa, itai zvose nezita raIshe Jesu, muchivonga Mwari baba naye.

¹⁸Vakadzi, muzviise pasi pavarume venyu, sezvazvakafanira muna Ishe.

¹⁹Varume, idai vakadzi venyu, regai kuva nehasha navo.

²⁰Vana, teererai vabereki venyu pazvinhu zvose, nokuti ndizvo zvakanaka muna Ishe.

²¹Madzibaba, regai kunetsa vana venyu, kuti varege kuora mwoyo.

²²Varanda, teererai pazvinhu zvose vatenzi venyu panyama; regai kubata basa pamberi pameso avo, savafadzi vavanhu, asi nomwoyo wakarurama muchitya Ishe.

²³Zvose zvamunoita, muzviite nomwoyo wose, sokuna Ishe, musingaitiri vanhu;

²⁴muchiziva kuti muchapiwa naIshe mubayiro wenhaka; nokuti munoshandira Ishe Kristu.

²⁵Nokuti anoita zvisakarurama, achapiwa zvisakarurama zvaakaita; hazvizi zvinoonekwa zvomunhu zvinotendwa.