Read Shona Union Version 2002 1 VATESARONIKA 3 Bible Online

1 VATESARONIKA 3 - Shona Union Version 2002 bible

1 VATESARONIKA 3

¹Saka zvatakanga tisingagoni kutsunga, takati zvakanaka kuti tisiyiwe tiri toga paAteni;

²tikatuma Timoti, hama yedu, mushumiri waMwari paVhangeri yaKristu, kuti akusimbisei, nokukutsungisai mwoyo pakutenda kwenyu;

³kuti kurege kuva nomunhu anozununguswa nenhamo idzi, nokuti munoziva mumene kuti takagadzirirwa izvozvo.

⁴Nokuti tichiri kwamuri takambokuudzai kuti tichatambudzwa; sezvazvakaitika, nemi munoziva.

⁵Saka iniwo, zvandakanga ndisingachagoni kutsunga, ndakamutuma kuti ndizive kutenda kwenyu, ndichiti zvimwe muedzo wakakuedzai, izvo zvatakabata zvikava pasina.

⁶Asi zvino Timoti akati asvika kwatiri achangobva kwamuri, akatiudza mashoko akanaka okutenda kwenyu norudo rwenyu, uye kuti munongositifunga nomurangariro wakanaka, muchida kutiona isu sesuo tichida kukuonai imi;

⁷saka, hama dzangu, takanyaradzwa pamusoro penyu pakutambudzika kwedu kwose nenhamo nokutenda kwenyu;

⁸nokuti zvino isu tinorarama, kana imi mumire makasimba muna Ishe.

⁹Nokuti tingavonga Mwari neiko pamusoro penyu nomufaro wose watinofara nawo pamberi paMwari wedu nokuda kwenyu,

¹⁰tichingokumbira zvikuru usiku namasikati kuti tione chiso chenyu, kuti tizadzise zvakatairira pakutenda kwenyu?

¹¹Zvino iye Mwari, baba vedu, naIshe wedu Jesu, ngaaruramisire nzira yedu kwamuri;

¹²ishe akukurisei, akuwanzisirei rudo pakati penyu nokuna vose, sezvatinoita isu kwamuri,

¹³asimbise mwoyo yenyu kuti ive isina chaingapomerwa pautsvene pamberi paMwari, baba vedu, pakuya kwaIshe wedu Jesu pamwechete navatsvene vake vose.