Read Shona Union Version 2002 1 VATESARONIKA 4 Bible Online

1 VATESARONIKA 4 - Shona Union Version 2002 bible

1 VATESARONIKA 4

¹Naizvozvo pakupedzisira, hama dzangu, tinokumbira kwamuri, nokukurayirai muna Ishe Jesu, kuti, sezvamadzidza kwatiri mutoo wamunofanira kufamba nokufadza Mwari nawo, sezvamunofambawo, kuti muwanze nokunzwisisa panaizvozvo.

²Nokuti munoziva mirayiro yatakakupai naIshe Jesu.

³Nokuti kuda kwaMwari ndihwo utsvene hwenyu, murege upombwe;

⁴kuti mumwe nomumwe wenyu azive kuzviwanira mudziyo wake noutsvene nokukudzwa,

⁵asingaiti nokukara kwokuchiva, savahedheni, vasingazivi Mwari;

⁶munhu ngaarege kuitira hama yake zvakaipa kana kumunyengera pachinhu ichi, nokuti Ishe ndiye mutsivi wezvinhu izvozvo zvose, sezvatakakuudzaiwo nokukupupurirai kwazvo.

⁷Nokuti Mwari haana kutidanira tsvina, asi utsvene.

⁸Naizvozvo anoramba izvozvo, haarambi munhu, asi Mwari, anokupai Mweya wake, iwo Mutsvene.

⁹Zvino, kana ruri rudo pakati pehama, hamufaniri kuti munyorerwe, nokuti imi mumene makadzidziswa naMwari kuti mudane;

¹⁰nokuti ndizvo zvamunoitira hama dzose dzeMakedhonia yose, asi tinokurayirai, hama dzangu, kuti muwanze nokuwanzisisa panaizvozvi;

¹¹shingairirai kuva norugare, mumwe nomumwe abate zvake, muchibata basa namaoko enyu, sezvatakakurairai;

¹²kuti mufambe nomutoo wakafanira kuna vari kunze, musingashayiwi chinhu.

¹³Zvino, hama dzangu, hatidi kuti mushayiwe kuziva pamusoro pavavete, kuti murege kuchema savamwe vasina tariro.

¹⁴Nokuti kana tichitenda kuti Jesu akafa, akamukazve, saizvozvowo avo vakavata muna Jesu, Mwari achavauyisa pamwechete naye.

¹⁵Nokuti tinokuudzai neshoko raIshe, kuti isu vapenyu, vakasara kusvikira pakuuya kwaIshe, hatingatongotangiri vakavata.

¹⁶Nokuti Ishe amene achaburuka kudenga nokudanidzira, nezwi romutumwa mukuru, nehwamanda yaMwari; vakafa muna Kristu vachatanga kumuka;

¹⁷zvino isu vapenyu, vakasara, tichatorwa pamwechete navo mumakore, kuti tichingamidze Ishe mudenga; naizvozvo tichava naIshe nguva dzose.

¹⁸Naizvozvo nyaradzanai namashoko awa.