Read Shona Union Version 2002 Joshua 21 Bible Online

Joshua 21 - Shona Union Version 2002 bible

Joshua 21

¹Zvino vakuru vedzimba dzamadzibaba avaRevhi vakaswedera kumupristi Ereazari, nokuna Joshua, mwanakomana waNuni, nokuvakuru vedzimba dzamadzibaba amarudzi avana vaIsiraeri,

²vakataura navo paShiro panyika yeKenani, vakati, “Jehovha wakaraira nomuromo waMosesi, kuti tipiwe maguta matingagara, namafuro awo emombe dzedu.”

³Vana vaIsiraeri vakapa vaRevhi panhaka dzavo maguta awa namafuro awo, sezvavakanga varairwa naJehovha.

⁴Mhuri dzavaKohati dzikagoverwa nemijenya; vana vomupristi Aroni vaiva vavaRevhi vakagoverwa nemijenya maguta ane gumi namatatu pakati porudzi rwaJudha, norwaSimeoni, norwaBhenjamini.

⁵Asi vamwe vavana vaKohati vakagoverwa nemijenya maguta ane gumi pakati pemhuri dzorudzi rwaEfuremu, norudzi rwaDhani, nehafu yorudzi rwaManase.

⁶Vana vaGerishoni vakagoverwa nemijenya maguta ane gumi namatatu pamhuri dzorudzi rwaIsakari, norudzi rwaAsheri, norudzi rwaNafutari, nehafu yorudzi rwaManase muBhashani.

⁷Vana vaMerari nemhuri dzavo vakapiwa maguta ane gumi namaviri pakati porudzi rwaRubheni, norudzi rwaGadhi, norudzi rwaZebhuruni.

⁸Vana vaIsiraeri vakapa vaRevhi maguta iwayo namafuro awo nemijenya, sezvakanga zvarairwa naJehovha nomuromo waMosesi.

⁹Vakavapa maguta iwayo, akarehwa mazita awo pano, pakati porudzi rwavana vaJudha, norudzi rwavana vaSimeoni.

¹⁰Akava avana vaAroni, vemhuri dzavaKohati, vaiva vana vaRevhi, nokuti ndivo vakatanga kugoverwa nemijenya.

¹¹Vakavapa Kiriati‐abha, iye Abha wakanga ari baba vaAnaki (ndiro Hebhuroni), panyika yamakomo yaJudha, namafuro aro akanga akaripoteredza.

¹²Asi minda yeguta, nemisha yaro, vakazvipa Karebhu mwanakomana waJefune, zvive zvake.

¹³Vakapa vana vomupristi Aroni Hebhuroni namafuro aro, rakanga riri guta routiziro romuurayi, uye Ribhina namafuro aro,

¹⁴neJatiri namafuro aro, neEshitemoa namafuro aro,

¹⁵neHoroni namafuro aro, neDhebhiri namafuro aro,

¹⁶neAini namafuro aro, neJuta namafuro aro, neBheti‐shemeshi namafuro aro; maguta mapfumbamwe pakati pamarudzi iwayo maviri.

¹⁷Napakati porudzi rwaBhenjamini Gibheoni namafuro aro, neGebha namafuro aro,

¹⁸neAnatoti namafuro aro, neArinoni namafuro aro; maguta mana.

¹⁹Maguta ose avana vaAroni mupristi akanga ari maguta ane gumi namatanhatu namafuro awo.

²⁰Mhuri dzavana vaKohati, ivo vaRevhi vakanga vasara vavana vaKohati, vakapiwa maguta avo nemijenya pakati porudzi rwaEfuremu.

²¹Vakavapa Shekemu namafuro aro panyika yamakomo yaEfuremu, raiva guta routiziro romuurayi, neGezeri namafuro aro,

²²neKibhizaimi namafuro aro, neBheti‐horoni namafuro aro; maguta mana.

²³Napakati porudzi rwaDhani, Eriteki namafuro aro, neGebhitoni namafuro aro,

²⁴neAjaroni namafuro aro, neGatirimoni namafuro aro; maguta mana.

²⁵Napakati pehafu yorudzi rwaManase, Taanaki namafuro aro, neGatirimoni namafuro aro; maguta maviri.

²⁶Maguta ose emhuri dzavakanga vasara vavana vaKohati aiva gumi namafuro awo.

²⁷Vana vaGerishoni, vemhuri dzavaRevhi, vakavapa Gorani namafuro aro, raiva guta routiziro romuurayi, pakati pehafu yorudzi rwaManase, neBhesheitera namafuro aro; maguta maviri.

²⁸Napakati porudzi rwaIsakari, Kishioni namafuro aro, neDhabherati namafuro aro,

²⁹neJarimuti namafuro aro, neEni‐ganimi namafuro aro; maguta mana.

³⁰Napakati porudzi rwaAsheri, Mishari namafuro aro, neAbhidhoni namafuro aro,

³¹neHerikati namafuro aro, neRehobhi namafuro aro; maguta mana.

³²Napakati porudzi rwaNafutari, Kedheshi muGarirea namafuro aro, raiva guta routiziro romuurayi, neHamoti‐dhori namafuro aro, neKaritani namafuro aro; maguta matatu.

³³Maguta ose avaGerishoni, nemhuri dzavo, akanga ari maguta ane gumi namatatu namafuro awo.

³⁴Mhuri dzavana vaMerari, ivo vakanga vasara kuvaRevhi, vakavapa pakati porudzi rwaZebhuruni, Jokineamu namafuro aro, neKatira namafuro aro,

³⁵neDhimuna namafuro aro, neNaharari namafuro aro; maguta mana.

³⁶Napakati porudzi rwaRubheni, Bhezeri namafuro aro, neJahazi namafuro aro,

³⁷neKedhemoti namafuro aro, neMofaati namafuro aro; maguta mana.

³⁸Napakati porudzi rwaGadhi, Ramoti muGireadhi namafuro aro, raiva guta routiziro romuurayi, neMahanaimu namafuro aro,

³⁹neHeshibhoni namafuro aro, neJazeri namafuro aro; iwo ose maguta mana.

⁴⁰Maguta awa ose akanga ari avana vaMerari, nemhuri dzavo, ivo vakanga vasara vemhuri dzavaRevhi; mugove wavo wakanga uri maguta ane gumi namaviri.

⁴¹Maguta ose avaRevhi pakati penhaka yavana vaIsiraeri aiva maguta ana makumi mana namasere namafuro awo.

⁴²Maguta awa ose akanga ana mafuro awo, guta rimwe nerimwe; ndizvo zvakanga zvakaita maguta iwayo ose.

⁴³Saizvozvo Jehovha akapa vaIsiraeri nyika yose yaakanga apika, kuti uchaipa madzibaba avo; ikava yavo, vakagaramo.

⁴⁴Jehovha akavazorodza kumativi ose, pose paakanga apikira madzibaba avo; hakuna munhu kuvavengi vavo vose wakamira pamberi pavo; asi Jehovha wakaisa vavengi vavo vose pamaoko avo.

⁴⁵Hakuna chinhu chimwe chezvinhu zvakanaka zvakanga zvataurwa naJehovha kuimba yaIsiraeri chakakona; zvose zvakaitika.