Read Shona Union Version 2002 Joshua 9 Bible Online

Joshua 9 - Shona Union Version 2002 bible

Joshua 9

¹Zvino madzimambo ose akanga agere mhiri kwaJorodhani, panyika yamakomo nenyika yamapani, napamhenderekedzo dzose dzegungwa guru pamberi peRebhanoni, vaHeti, navaAmori, navaKenani, navaPerezi, navaHivhi, navaJebhusi, vakati vachinzwa izvozvo,

²vakaungana nomwoyo mumwe kundorwa naJoshua navaIsiraeri.

³Asi vanhu veGibheoni vakati vachinzwa zvakanga zvaitirwa Jeriko neAi naJoshua,

⁴vakatsvaka mano, vakaenda senhume, vakaenda nehomo dzakasakara pamusoro pembongoro dzavo, nehombodo dzewaini dzakasakara, dzakanga dzakaparuka, nokusonanidzwazve;

⁵neshangu dzakasakara, dzaiva nezviremo patsoka dzavo, nenguo dzakasakara; zvingwa zvavo zvose zvembuva yavo zvakanga zvakaoma nokuvhuvha.

⁶Vakaenda kuna Joshua kumisasa paGirigari, vakati kwaari nokuvarume vaIsiraeri, “Tinobva kunyika iri kure; naizvozvo itai sungano nesu zvino.”

⁷Varume vaIsiraeri vakati kuvaHivhi, “Zvimwe mugere pakati pedu; tingaita sungano nemi seiko?”

⁸Ivo vakati, “Tiri varanda venyu.” Joshua akati kwavari, “Ndimi aniko? Munobvepi?”

⁹Vakati, “Varanda venyu vabva kunyika iri kure‐kure, nokuda kwezita raJehovha Mwari wenyu, nokuti takanzwa mukurumbira wake nezvose zvaakaita Ijipiti.

¹⁰Uye zvose zvaakaitira madzimambo maviri avaAmori, akanga ari mhiri kwaJorodhani, naSihoni mambo weHeshibhoni, naOgi mambo weBhashani, wakanga ari paAshitaroti.

¹¹Vakuru vedu navanhu vose venyika yedu vakataura nesu, vakati, ‘Torai mbuva yenzira mumaoko enyu, mundosangana navo,’ muti kwavari, ‘Tiri varanda venyu; zvino itai sungano nesu.

¹²Zvingwa izvo zvembuva yedu takazvitora zvichakapisa mudzimba dzedu musi watakabuda, tichiuya kwamuri; asi zvino tarirai, zvaoma, zvavhuvha.

¹³Nehombodo idzi dzewaini, dzatakazadza, dzakanga dziri itsva; tarirai, dzaparuka; nenguo dzedu idzi, neshangu dzedu zvasakara nemhaka yorwendo rurefu‐refu.’ ”

¹⁴Ipapo varume vakatora zvimwe zvembuva yavo, vasingabvunzi muromo waJehovha.

¹⁵Joshua akayanana navo, akaita sungano navo, kuti vachavarega vari vapenyu; machinda eungano akapika kwavari.

¹⁶Zvino mazuva matatu akati apera, vaita sungano navo, vakanzwa kuti vagere pedyo navo napakati pavo.

¹⁷VaIsiraeri vakafamba, vakasvika pamaguta avo nezuva retatu. Maguta avo aiva Gibheoni, neKefira, neBheroti, naKiriati‐jearimi.

¹⁸Vana vaIsiraeri havana kuvaparadza, nokuti machinda eungano akanga apika kwavari naJehovha Mwari waIsiraeri. Ungano yose ikapopotera machinda.

¹⁹Asi machinda ose akati kuungano yose, “Takapika kwavari naJehovha, Mwari waIsiraeri, naizvozvo zvino hatigoni kuvaitira chinhu.

²⁰Tichavaitira chinhu ichi, tichavarega vari vapenyu, kuti tirege kuwirwa nokutsamwa kwaMwari nokuda kwokupika, kwatakapika kwavari.”

²¹Zvino machinda akati kwavari, “Ngavararame havo. Vakava vatemi vehuni navateki vemvura veungano yose, sezvavakaudzwa namachinda.”

²²Zvino Joshua akavadana, akataura navo, akati, “Matinyengedzerereiko, muchiti, ‘Takabva kure‐kure nemi, zvamugere pakati pedu?’

²³Naizvozvo zvino muri vanhu vakatukwa, muchangosiva varanda navatemi vehuni navateki vemvura veimba yaMwari wangu.”

²⁴Vakapindura Joshua, vakati, “Nokuti varanda venyu vakanga vaudzwa zvirokwazvo kuti Jehovha Mwari wenyu wakanga araira muranda wake Mosesi, kuti akupei nyika yose, nokuparadza vose vagere panyika ino pamberi penyu; naizvozvo takatya kwazvo nokuda kwenyu kuti tichaurawa, tikaita chinhu ichi.

²⁵Zvino tarirai, tiri pamaoko enyu, itai nesu sezvamunoti ndizvo zvakanaka nezvakarurama.”

²⁶Akavaitira saizvozvo, akavarwira pamaoko avana vaIsiraeri, ivo vakasavauraya.

²⁷Musi iwoyo Joshua akavaita vatemi vehuni navateki vemvura yeungano neyeatari yaJehovha, kusvikira nhasi panzvimbo yaizotsaurwa naye.