Read Shona Union Version 2002 2 Vatesaronika 2 Bible Online

2 Vatesaronika 2 - Shona Union Version 2002 bible

2 Vatesaronika 2

¹Zvino tinokumbira kwamuri, hama dzangu, pamusoro pokuuya kwaIshe wedu Jesu Kristu, nokuungana kwedu kwaari;

²kuti murege kukurumidza kuzununguswa pakufunga kwenyu, kana kuvunduswa, kana nomweya, kana neshoko, kana netsamba, inonzi inobva kwatiri, muchiti zuva raKristu ratosvika;

³ngakurege kuva nomunhu anokunyengerai nomutoo upi noupi; nokuti harisviki, kana kutsauka kusati kwatanga kuuya, nomunhu wezvivi, mwanakomana wokurashika, asati amboonekwa,

⁴iye, anorwa achizvikudza pamusoro pezvose zvinonzi Mwari, kana zvinonamatwa; nokudaro kuti anogara muTemberi yaMwari, achizviita Mwari.

⁵Hamurangariri here kuti, ndichiri kwamuri, ndakakuudzai izvozvi?

⁶Zvino munoziva chinodzivisa, kuti aratidzwe nenguva yake.

⁷Nokuti chakavanzika chokusarurama chotobata basa racho; asi zvichaitwa bedzi kusvikira iye anodzivisa zvino achibviswa.

⁸Ipapo iye asakarurama achaonekwa, iye achaurawa naIshe Jesu nomweya womuromo wake, achiparadza nokuonekwa kwokuuya kwake;

⁹kuuya kwake iye kwakaita sebasa raSatani nesimba rose, nezviratidzo, nezvinoshamisa zvenhema,

¹⁰nokunyengera kwose kwokusarurama kuna vanorashika; nokuti havana kugamuchira rudo rwezvokwadi, kuti vaponeswe.

¹¹Saka Mwari anovatumira simba rokukanganisa, kuti vatende nhema,

¹²kuti vose vasina kutenda chokwadi, asi vakafarira zvisakarurama, vatongwe.

¹³Asi isu tinofanira kuvonga Mwari nguva dzose pamusoro penyu, hama dzangu, vadikanwi vaIshe, nokuti Mwari akakutsanangurai kubva pakutanga, kuti muponeswe muutsvene hwoMweya nokutenda chokwadi.

¹⁴Izvo zvaakakudanirai neVhangeri yedu, kuti muwane kubwinya kwaIshe wedu Jesu Kristu.

¹⁵Naizvozvo, hama dzangu, mirai makasimba, muchengete mirayiro yamakadzidziswa, kana neshoko kana netsamba yedu.

¹⁶Zvino, Ishe wedu Jesu Kristu amene, naMwari Baba vedu, vakatida, vakatipa nenyasha dzavo kuvaraidzwa kusingaperi netariro yakanaka,

¹⁷ngavavaraidze mwoyo yenyu, vakusimbisei pamabasa ose namashoko ose akanaka.