Read Shona Union Version 2002 1 TIMOTI 1 Bible Online

1 TIMOTI 1 - Shona Union Version 2002 bible

1 TIMOTI 1

¹Pauro, mupostori waKristu Jesu nokurayira kwaMwari, Muponesi wedu, naKristu Jesu, tariro yedu;

²kuna Timoti, mwana wangu chaiye pakutenda: Nyasha, nengoni, norugare, zvinobva kuna Mwari Baba, naKristu Jesu, Ishe wedu, ngazvive newe.

³Sezvandakakumbira zvikuru kwauri, ini ndichienda Makedhonia, ndinoti, usare muEfeso, kuti urayire vamwe, varege kudzidzisa dzimwe dzidziso;

⁴kana kurangarira ngano namazita amadziteteguru asingaperi, zvinongomutsa nharo, zvisingatendesi zvakarayirwa naMwari, zviri mukutenda.

⁵Asi chinovavarirwa nomurayiro ndirwo rudo runobva pamwoyo wakachena, napahana yakanaka, napakutenda kusinganyengeri;

⁶vamwe vakarashika pazvinhu izvozvi, vakatsaukira kukutaura kusina maturo;

⁷vachitsvaka kuti vave vadzidzisi vomurayiro, vasingazivi zvavanoreva kana zvavanosimbisa.

⁸Asi tinoziva kuti murayiro wakanaka, kana munhu achiita nawo sezvinoreva murayiro,

⁹achiziva kuti murayiro hauna kuitirwa wakarurama, asi vasina hanya nomurayiro, navasingateereri, navasingadi Mwari, navatadzi, navasi vatsvene, navasina hanya naMwari, navanorova madzibaba, navanorova madzimai, navanouraya vanhu;

¹⁰nemhombwe, navanopombora navarume, navanoba vanhu, navanoreva nhema, navanopika nhema, uye kana chimwe chiriko chinopesana nedzidziso yakarurama;

¹¹sezvinoreva Vhangeri yokubwinya kwaMwari womufaro, yandakapiwa ini.

¹²Ndinomuvonga iye Kristu Jesu, Ishe wedu, akandipa simba, nokuti akati ndakatendeka, akandiisa pabasa rake;

¹³kunyange ini ndaiva aishonha Mwari kare, nomutambudzi ndichiitira vanhu zvakaipa; asi ndakaitirwa ngoni, nokuti ndakanga ndichizviita nokusaziva pakusatenda;

¹⁴asi nyasha dzaIshe wedu dzakawanda zvikuru nokutenda, norudo ruri muna Kristu Jesu.

¹⁵Ishoko rechokwadi, rinofanira kutendwa kwazvo, kuti Kristu Jesu akauya panyika kuzoponesa vatadzi; avo ini ndiri mukuru wavo;

¹⁶asi naizvozvo ndakaitirwa ngoni, kuti Jesu Kristu aratidze mwoyo wake wose murefu mandiri, ini mukuru wavatadzi, kuti ndive chiratidzo kuna vanozotenda kwaari, zvinovaisa kuupenyu husingaperi.

¹⁷Zvino iye Ishe asingaperi, asingafi, asingaonekwi, Mwari woga, ngaave nokukudzwa nokubwinya nokusingaperi-peri. Ameni.

¹⁸Basa iri, rakarayirwa, ndinokupa iro, iwe Timoti, mwana wangu, kuti sezvazvakaporofitwa kare pamusoro pako, urwe pfumo rakanaka mazviri;

¹⁹wakabata kutenda nehana yakarurama; iyo yakarashwa navamwe, vakarashikirwa nokutenda;

²⁰vamwe vavo ndiHimenio naArekizanda, vandakaisa kuna Satani, vadzidziswe kuti varege kushonha Mwari.