Read Shona Union Version 2002 1 TIMOTI 3 Bible Online

1 TIMOTI 3 - Shona Union Version 2002 bible

1 TIMOTI 3

¹Ishoko rechokwadi, rokuti, kana munhu achitsvaka basa romutariri, anoda basa rakanaka.

²Naizvozvo mutariri anofanira kuva munhu asina chaangapomerwa, murume womukadzi mumwechete, akangwara, akachenjera, anomugariro wakafanira, anoitira vaeni rudo, anoziva kudzidzisa,

³asingadi waini, asingarwi; asi munyoro, asina gakava, asingakariri mari;

⁴anobata imba yake zvakanaka, anavana vanozviisa pasi nomugariro wose unokudzwa;

⁵(kana munhu asingazivi kubata imba yake, angachengeta seiko kereke yaMwari?)

⁶Asava mutendi mutsva, kuti arege kuzozvikudza, atongwe saDhiabhori.

⁷Uyezve, unofanira kupupurirwa zvakanaka navari kunze, kuti arege kuzvidzwa, nokubatwa mumusungo waDhiabhorosi.

⁸Saizvozvowo vashumiri ngavave vanokudzwa, vasina mazwi maviri, vasingadi waini zhinji, vasingakariri pfuma yakaipa;

⁹vanochengeta zvakavanzika zvokutenda muhana yakanaka.

¹⁰Naivo ngavatange kuedzwawo, ipapo vashumire, kana vasina chavangapomerwa.

¹¹Saizvozvo navakadzi ngavave vanokudzwa, vasingacheri vamwe, vakasvinuka, vakatendeka pazvose.

¹²Vashumiri ngavave varume vanomukadzi mumwechete, vanobata vana vavo nedzimba dzavo zvakanaka;

¹³nokuti avo vakushumira zvakanaka, vanozviwanira zita rinokudzwa, nokutsunga kukuru pakutenda kwavo muna Kristu Jesu.

¹⁴Zvinhu izvi zvose ndinokunyorera, ndichiti ndichakurumidza kuuya kwauri;

¹⁵zvino kana ndikanonoka, ndinoda kuti uzive kuti vanhu vanofanira kufamba sei mumba maMwari, iyo kereke yaMwari mupenyu, mbiru nechitsigiro chechokwadi.

¹⁶Hakuna angaramba kuti chakavanzika chokunamata chikuru kwazvo, chokuti: Iye akaratidzwa panyama, akaruramiswa pamweya, akaonekwa navatumwa, akaparidzwa pakati pavahedheni, akatendwa panyika, akakwidzwa mukubwinya.