Read Shona Union Version 2002 1 TIMOTI 4 Bible Online

1 TIMOTI 4 - Shona Union Version 2002 bible

1 TIMOTI 4

¹Zvino Mweya anoreva pachena, kuti panguva dzinouya vamwe vachatsauka pakutenda, vachiteerera mweya inonyengera nedzidziso dzomweya yakaipa,

²vachinyengerwa navanoreva nhema, vakapiswa pahana dzavo nedare rinopisa,

³vachidzivisa vanhu kuwanana, nokurayira kuti zvimwe zvokudya zviregwe, zvakasikwa naMwari, kuti zvigamuchirwe nokuvonga navanotenda, vanoziva chokwadi.

⁴Nokuti zvose zvakasikwa naMwari zvakanaka, hakuna chinhu chingafanira kurashwa, kana chichigamuchirwa nokuvonga;

⁵nokuti chinoitwa chitsvene neshoko raMwari nokunyengetera.

⁶Kana uchiudzira hama zvinhu izvi, uchava mushumiri akanaka waKristu Jesu, wakarerwa namashoko okutenda needzidziso yakanaka, yawakatevera nomwoyo wose.

⁷Asi urambe ngano dzisina hanya naMwari nedzechembere. Uzvirovedze kunamata Mwari.

⁸Nokuti kurovedza muviri kunobatsira zvishoma hazvo, asi kunamata Mwari kunobatsira pazvinhu zvose, zvakune chipikirwa choupenyu hwazvino nohunouya.

⁹Ishoko rachokwadi, rinofanira kutendwa kwazvo.

¹⁰Nokuti ndizvo zvatinotambudzikira nokurwira, nokuti tariro yedu iri kuna Mwari mupenyu, Muponesi wavanhu vose, zvikuru wavanotenda.

¹¹Rayira nokudzidzisa zvinhu izvi.

¹²Munhu ngaarege kuvapo anozvidza uduku hwako, asi uitire vanotenda makwara, pashoko napamufambiro, naparudo, napakutenda, napakuchena kwomwoyo.

¹³Shingaira pakurava, napakurayira, napakudzidzisa, kusvikira ndichiuya.

¹⁴Usarega kuchengeta chipiwa chiri mauri, chawakapiwa nokuporofita, nokuiswa maoko avakuru.

¹⁵Shingairira zvinhu izvi, uzviite nomwoyo wose, kuti kupfuurira mberi kwako kuonekwe navanhu vose.

¹⁶Uzvichengete iwe nedzidziso yako. Urambire pazvinhu izvi, nokuti kana uchiita izvozvi, uchazviponesa iwe navanokunzwa.