Read Shona Union Version 2002 1 TIMOTI 5 Bible Online

1 TIMOTI 5 - Shona Union Version 2002 bible

1 TIMOTI 5

¹Usatuke mukuru, asi umuraire sababa, navaduku savanun'una,

²navakadzi vakuru samadzimai, navaduku sehanzvadzi nokuchena kwomwoyo kwose.

³Kudza chirikadzi, dziri chirikadzi chaidzo.

⁴Asi kana chirikadzi ina vana kana vazukuru, ngavatange ivo kudzidza kunamata Mwari paimba yavo, vadzosere zvakafanira kuvabereki vavo, nokuti ndizvo zvinofadza Mwari.

⁵Zvino kana iri chirikadzi chaiyo, yakasiyiwa iri yoga, ndiyo inovimba naMwari, inogara ichikumbira nokunyengetera usiku namasikati.

⁶Asi iyo inokarira zvinofadza, yakafa ichiri mhenyu.

⁷Rayirawo zvinhu izvi, kuti varege kuva nechavangapomerwa.

⁸Asi kana munhu asingachengeti vokwake, zvikuru veimba yake, arasa kutenda, akaipa kukunda asingatendi.

⁹Chirikadzi ngairege kunyorwa zita, asi kana yasvika makore makumi matanhatu, yaiva mukadzi womurume mumwechete,

¹⁰ino rumbidzwa pamusoro pamabasa akanaka, kana yakarera vana, kana yaifarira vaeni, kana yaishambidza tsoka dzavatsvene, kana yaibatsira vari munjodzi, kana yaishingairira mabasa ose akanaka.

¹¹Asi urambe chirikadzi kana vachiri vakadzi vaduku, nokuti kana dzopesana naKristu, dzotsvaka kuwanikwa;

¹²dzava nemhosva, nokuti dzaramba kutenda kwokutanga;

¹³uyezve, dzinodzidza kuva nousimbe dzichipota nedzimba; hadzizi simbe bedzi, asi vaitiwo vamakuhwa, dzisingaregi zvavamwe, dzichitaura zvisakafanira.

¹⁴Naizvozvo ndinoda kuti chirikadzi duku dziwanikwe, dzibereke vana, dzichengete dzimba dzadzo, kuti dzirege kutongopa muvengi nzira yokupomera nayo.

¹⁵Nokuti vamwe vatotsauka vachitevera Satani.

¹⁶Kana mukadzi mutendi ane chirikadzi, ngaadzibatsire, kereke irege kuremedzwa, kuti igobatsira chirikadzi chaidzo.

¹⁷Vakuru vanobata kereke zvakanaka ngavanzi vanofanirwa nokukudzwa kaviri, zvikuru avo vanobata pashoko napakudzidzisa.

¹⁸Nokuti Rugwaro runoti, “Usasunga muromo wenzombe inopura;” uyezve, “Mubati wakafanirwa nomubayiro wake.”

¹⁹Usangotenda mhaka inopomerwa mukuru, asi kana ichibva pamiromo yezvapupu zviviri kana zvitatu.

²⁰Vanotadza uvarange pamberi pavose, kuti vamwe vagotya.

²¹Ndinokurayira kwazvo pamberi paMwari, naKristu Jesu, navatumwa vakasanangurwa, kuti uchengete zvinhu izvi usingatongi usati wambonzwa kwazvo, kana kuita chinhu uchitsaura vanhu.

²²Usakurumidza kuisa maoko pamusoro pomunhu, kana kusangana pazvivi zvavamwe; uzvichengete kuti uve wakachena.

²³Usaramba uchingonwa mvura bedzi, asi unwe waini shoma nokuda kwomudumbu mako noutera hwako huzhinji.

²⁴Zvivi zvavamwe vanhu zvinoonekwa pachena, zvinotungamirira kutongwa kwavo, vamwezve vanoteverwa nazvo.

²⁵Saizvozvowo kuna mabasa akanaka anoonekwa pachena, naasina kudaro haangavanzwi.