Read Shona Union Version 2002 2 TIMOTI 2 Bible Online

2 TIMOTI 2 - Shona Union Version 2002 bible

2 TIMOTI 2

¹Naizvozvo iwe, mwana wangu, iva nesimba munyasha dziri muna Kristu Jesu.

²Izvo zvawakanzwa kwandiri pamberi pezvapupu zvizhinji, uzvipe vanhu vakatendeka, vanogonawo kudzidzisa vamwe.

³Utambudzike pamwechete neni, somurwi wakanaka waKristu Jesu.

⁴Hakuna munhu anorwa papfumo anozvipinganidza namabasa ohupenyu huno, kuti agone kufadza uyo wakakokera kuhondo.

⁵Nemunhuwo kana achivhivhana navamwe, haashongedzwi korona, kana asina kuvhivhana sezvakarayirwa.

⁶Murimi anobata basa ndiye anofanira kutanga kudya zvibereko.

⁷Funga zvandinoreva, nokuti Ishe achakupa kunzwisisa pazvinhu zvose.

⁸Rangarira Jesu Kristu akamuka kuvakafa, worudzi rwaDhavhidhi, sezvandinoparidza neVhangeri yangu;

⁹yandinotambudzikira kusvikira pakusungwa somunyangadzi; asi shoko raMwari harina kusungwa.

¹⁰Saka ndinotsungirira pazvinhu zvose nokuda kwavakasanangurwa, kuti naivo vawane kuponeswa kuri muna Kristu Jesu, pamwechete nokubwinya kusingaperi.

¹¹Ishoko rechokwadi; “Nokuti kana tikafa pamwechete naye tichararamawo pamwechete naye.

¹²Kana tikatsungirira, tichabata ushe pamwechete naye; kana tikamuramba, iye achatirambawo.

¹³Kana isu tisakatendeka iye anoramba akatendeka, nokuti haangazvirambi iye.”

¹⁴Uvayeuchidze zvinhu izvi, uvarayire pamberi paMwari, kuti varege kuita nharo zvisina maturo, zvinongoparadza vanonzwa.

¹⁵Shingaira kuti uzviratidze pamberi paMwari uri munhu akatendeka, mubati asingafaniri hake kunyadziswa, anonatsa kururamisa shoko rechokwadi.

¹⁶Nzvenga kutaura kusina hanya naMwari; nokuti vanhu vacharamba vachingonyanya pakusanamata Mwari,

¹⁷neshoko ravo richanyenga seronda; pakati pavo kuna Himenayo naFireto;

¹⁸ivo vakarasika pachokwadi, vachiti, kumuka kwavakafa kwatopfuura, vachikanganisa kutenda kwavamwe.

¹⁹Kunyange zvakadaro, nheyo dzakasimba dzaMwari dzinomira, dzine chisimbiso ichi, “Ishe anoziva vanhu vake;” uye “Mumwe nomumwe anoreva zita raIshe ngaabve pakusarurama.”

²⁰Zvino muimba huru hamuna midziyo yendarama neyesirivha bedzi, asi mimwe yamatandawo, neyevhu; mimwe inokudzwa, mimwe isingakudzwi.

²¹Naizvozvo kana munhu achizvinatsa kwazvo pazvinhu izvi, achava mudziyo unokudzwa, wakaitwa mutsvene, wakakwanira basa raTenzi, wakagadzirirwa mabasa ose akanaka.

²²Asi tiza kuchiva kwoujaya, uvinge kururama, nokutenda, norudo, norugare, pamwechete navanodana kuna Ishe nomwoyo wakachena.

²³Asi urambe mibvunzo youpenzi nokusaziva, uchiziva kuti zvinobereka kukakavara.

²⁴Zvino muranda washe haafaniri kukakavara, asi ave munyoro kuvanhu vose, anoziva kudzidzisa, anotsungirira pakuitirwa zvakaipa,

²⁵anodzidzisa nounyoro avo vanomudzivisa, kuti zvimwe Mwari avape kutendeuka vagoziva chokwadi,

²⁶vapengenukezve, vabve pamusungo waDhiabhori, wavakanga vakabatwa naye kuti vaite kuda kwake.