Read Shona Union Version 2002 2 TIMOTI 4 Bible Online

2 TIMOTI 4 - Shona Union Version 2002 bible

2 TIMOTI 4

¹Ndinokupupurira kwazvo pamberi paMwari, naKristu Jesu, iye achatonga vapenyu navakafa pakuonekwa kwake noushe hwake;

²paridza shoko; ramba uchidaro nenguva yakafanira, kunyange isakafanira; rayira, tuka, ranga nomwoyo murefu zvikuru nokudzidzisa.

³Nokuti nguva ichasvika yavacharamba kutendera dzidziso yakarurama, asi, vachida kufadzwa panzeve dzavo, vachazviunganidzira vadzidzisi pakuchiva kwavo,

⁴vachifuratidza nzeve dzavo pachokwadi, vachitsaukira kungano.

⁵Asi iwe svinura pazvinhu zvose, tambudzika, bata basa romuvhangeri, upedzise basa rako kwazvo.

⁶Nokuti ini ndotodururwa, nguva yokuenda kwangu yasvika.

⁷Ndarwa kurwa kwakanaka, ndapedza rwendo rwangu, ndakachengeta kutenda;

⁸kubva zvino ndakachengeterwa korona yokururama, yandichapiwa naIshe, Mutongi wakarurama, nezuva irero; ndisini ndoga, asi navose vakada kuonekwa kwake.

⁹Shingaira kuti ukurumidze kuuya kwandiri.

¹⁰Nokuti Dhemasi akandisiya, akada nyika yazvino, akaenda Tesaronika; Kiresenzi akaenda Garatiya, naTito akaenda Dharimatia.

¹¹Ruka oga aneni. Tora Mako uuye naye, nokuti anondibatsira kwazvo pabasa.

¹²Asi Tikiko ndakamutuma Efeso.

¹³Nguo yandakasiya paTiroa kuna Karipo, uuye nayo pakuuya kwako, nebhuku, zvikuru magwaro amatehwe.

¹⁴Arekizanda, mupfuri wendarira, akandiitira zvakaipa zvizhinji; Ishe achamutsiva paakaita napo;

¹⁵newewo umuchenjere, nokuti akadzivisa zvikuru mashoko edu.

¹⁶Pakuzvidavirira kwangu kwokutanga kwakanga kusina munhu akandibatsira, asi vose vakandisiya. Ngavarege kuravirwa izvozvi.

¹⁷Asi Ishe akamira neni, akandisimbisa, kuti ndipedzise kwazvo kuparidza kwangu, vahedheni vose vanzwe; ndikarwirwa pamuromo weshumba.

¹⁸Ishe achandirwira pamabasa ose akaipa, achandiponesa ndipinde ushe hwake hwokudenga; kubwinya ngakuve kwaari nokusingaperi-peri. Ameni.

¹⁹Ndikwazisirei Pirisika naAkwira, neimba yaOnesiforo.

²⁰Erasito akasara paKorinde, asi Tirofimo ndakamusiya paMireto achirwara.

²¹Shingaira kuuya, chando chisati chasvika. Yubhuro, naPudhe, naRino, naKiraudhiya nehama dzose vanokukwazisa.

²²Ishe ngaave nomweya wako. Nyasha ngadzive nemi.