Read Shona Union Version 2002 TITO 3 Bible Online

TITO 3 - Shona Union Version 2002 bible

TITO 3

¹Uvayeuchidze kuti vazviise pasi pavabati navane simba, kuti vateerere, kuti vave vanhu vakazvigadzira kubata mabasa ose akanaka,

²varege kurevera mumwe zvakaipa, vaitire vanhu vose unyoro hwose.

³Nokuti nesuwo kare taiva vokusafunga, tisingateereri, takarashika, tiri varanda, vokuchiva kuzhinji navezvose zvinofadza, tigere mukati mokushata negodo, tichivengwa, tichivengana.

⁴Asi unyoro hwaMwari, Muponesi wedu, norudo rwake kuvanhu, zvakati zvaonekwa,

⁵akatiponesa, asingazviiti nokuda kwamabasa akarurama, atakanga taita isu, asi nokuda kwenyasha dzake, nenzira yokushambidzwa kwokuberekwa kutsva nokuvandudzwa naMweya Mutsvene,

⁶waakadurura achiwanza pamusoro pedu, naJesu Kristu Muponesi wedu,

⁷kuti isu, taruramiswa nenyasha dzake, tiitwe vadyi venhaka nokuda kwetariro youpenyu husingaperi.

⁸Ishoko rechokwadi, uye ndinoda kuti usimbise kwazvo zvinhu izvi, zvokuti avo vakatenda Mwari vachenjere kuti varambe vachiita mabasa akanaka. Ndizvo zvakanaka, zvinobatsira vanhu;

⁹asi unzvenge mibvunzo youpenzi, namazita amadziteteguru, negakava, nokukakavara pamusoro pomurayiro, nokuti hazvina maturo, hazvine basa.

¹⁰Munhu anodzidzisa zvakatsauka, kana arayirwa kamwe norwechipiri, umurambe,

¹¹zvaunoziva kuti akadaro akatsauka, anotadza, azvipa mhosva amene.

¹²Kana ndichituma Aritema kwauri, kana Tikiko, ushingaire kuuya kwandiri Nikopori; nokuti ndakati ndichagara chando ikoko.

¹³Zenasi, mududziri womurayiro, naAporo, uvaise zvakanaka parwendo, varege kushayiwa chinhu.

¹⁴Vanhu vedu ngavadzidzewo kuramba vachiita mabasa akanaka, kuti vabatsire panoshayikwa zvinofanira kuvapo, kuti varege kuva vanhu vasina zvibereko.

¹⁵Vose vari kwandiri vanokukwazisa. Ndikwazisire avo vanotida pakutenda. Nyasha ngadzive nemi mose.