Read Shona Union Version 2002 FIRIMONI 1 Bible Online

FIRIMONI 1 - Shona Union Version 2002 bible

FIRIMONI 1

¹Pauro, musungwa waKristu Jesu, naTimoti, hama yedu, kuna Firimoni, mudikanwi wedu noanobata nesu,

²nokunaAfia, hanzvadzi yedu, nokunaAkipo, murwi pamwechete nesu, nokukereke iri mumba mako:

³Nyasha ngadzive nemi, norugare zvinobva kuna Mwari, Baba vedu, naShe Jesu Kristu.

⁴Ndinovonga Mwari wangu nguva dzose, kana ndichikurangarira pakunyengetera kwangu,

⁵zvandinonzwa zvorudo rwako nokutenda kwaunako kunaShe Jesu nokuvatsvene vose;

⁶kuti kugovana kwokutenda kwako kuve nesimba, kuti zvakanaka zvose zviri mukati medu kuna Kristu zvizikanwe;

⁷nokuti ndakanga ndinomufaro mukuru nokunyaradzwa nokuda kworudo rwako, nokuti mwoyo yavatsvene yakazorodzwa newe, hama yangu.

⁸Naizvozvo, kunyange ndisingatongotyi muna Kristu kukurayira kuita zvakafanira,

⁹kunyange zvakadaro, nokuda kworudo ndinoita zvokukumbira zvikuru, zvandakadai hangu, ini Pauro, mutana, uye zvino musungwa waKristu Jesu.

¹⁰Ndinokumbira zvikuru kwauri pamusoro pomwana wangu, wandakabereka pakusungwa kwangu, Onesimo,

¹¹akanga asingakubatsiri kare, asi zvino anobatsira zvikuru, iwe neni;

¹²ndinomudzosera kwauri, iye amene, mwoyo wangu chaiwo;

¹³ndaida kuti agare neni, kuti panzvimbo yako andishumire pakusungwa kwangu nokuda kweVhangeri;

¹⁴asi ndakanga ndisingadi kuita chinhu, iwe usati watenda, kuti zvakanaka zvaungaita zvirege kuitwa nokurovererwa, asi nokuda kwako.

¹⁵Nokuti zvimwe wakaparadzaniswa newe chinguva nemhaka iyi, kuti ugozova naye nokusingaperi;

¹⁶arege kuzova muranda, asi munhu anopfuura muranda, ave hama inodikanwa, panyama nomunaShe, zvikuru kwandiri, asi zvikuru kwazvo kwauri.

¹⁷Zvino kana uchiti ndiri mugovani newe, umugamuchire sezvaungandigamuchira ini.

¹⁸Asi kana akakuitira chinhu chisakarurama, kunyange ane ngava newe, undiravireni izvozvo.

¹⁹Ini Pauro, ndinozvinyora noruoko rwangu, ndicharipa; ndisingarevi hangu kuti pamusoro pezvose une ngava kwandiri, ndiyewe umene.

²⁰Hongu, hama, ngandive nomufaro kwauri munaShe; uzorodze mwoyo wangu muna Kristu.

²¹Ndinokunyorera, nokuti ndinotenda kuteerera kwako, ndichiziva kuti uchaitawo kupfuura pandinoreva napo.

²²Asi ndigadzirirewo pokugara, nokuti ndinotarira kuti muchandipiwa ini nokuda kwokunyengetera kwenyu.

²³Epafirasi, musungwa pamwechete neni muna Kristu, anokukwazisa.

²⁴NaMako, naArisitakusi, naDhemasi, naRuka, vanobata basa pamwechete neni.

²⁵Nyasha dzaShe Jesu Kristu ngadzive nomweya wenyu.