Read Shona Union Version 2002 VAHEBHERU 1 Bible Online

VAHEBHERU 1 - Shona Union Version 2002 bible

VAHEBHERU 1

¹Mwari akataura kare kuna madzibaba muvaporofita nemigove mizhinji, uye nemitoo mizhinji,

²zvino pakupedzisira kwamazuva ano akataura kwatiri muMwanakomana wake, waakaita mudyi wenhaka yezvinhu zvose, waakaitawo naye nyika;

³iye chadzera chokubwinya kwake, nomufananidzo wake chaiye, anochengeta zvinhu zvose nezwi resimba rake, akati apedzisa kunatswa kwezvivi, akagara kurudyi rwoUmambo kudenga,

⁴akapfuura vatumwa nokunaka saizvozvo, sezita raakagara nhaka yaro, rakanyanya kunaka kupfuura ravo.

⁵Nokuti akambotaura kuna ani wavatumwa achiti, “Ndiwe Mwanakomana wangu, Nhasi ndakakubereka? Uyezve, Ndichava baba vake, Iye achava Mwanakomana wangu?”

⁶Uye, kana achizouyisazve dangwe rake panyika, anoti, “Vatumwa vose vaMwari ngavamunamate.”

⁷Napamusoro pavatumwa anoti, “Iye anoita vatumwa vake kuti vave mhepo, Navaranda vake, kuti vave murazvo womoto;”

⁸Asi pamusoro poMwanakomana, anoti, “Chigaro chenyu choushe, imi Mwari, chiripo nokusingaperi-peri, Netsvimbo yokururama ndiyo tsvimbo youshe hwako.

⁹Makada kururama, mukavenga kusarurama; Saka Mwari, iye Mwari wenyu, akakuzodzai Namafuta okufara kupfuura shamwari dzenyu.”

¹⁰Uye, “Imi, Ishe, makateya nheyo dzenyika pakutanga, Nedenga ndiro basa ramaoko enyu;

¹¹Iro richapera, asi imi mucharamba muripo; Richasakara rose senguo;

¹²Mucharipeta sechinofukwa, Senguo, rikashandurwa; Asi imi hamushanduki, namakore enyu haangagumi.”

¹³Asi akambotaura kuna ani wavatumwa, achiti, “Gara kurudyi rwangu, Kusvikira ndichiita vavengi vako vave chitsiko chetsoka dzako?”

¹⁴Ko havazi vose mweya inoshumira, yakatumwa kuzobata nokuda kwavanodya nhaka yokuponeswa here?