Read Shona Union Version 2002 VAHEBHERU 13 Bible Online

VAHEBHERU 13 - Shona Union Version 2002 bible

VAHEBHERU 13

¹Rudo pakati pehama ngarugare.

²Musakanganwa kuitira vaeni rudo; nokuti vachidaro vamwe vakagarisa vatumwa mumba, vasingazvizivi.

³Fungai vakasungwa, somunenge makasungwa pamwechete navo; naivo vanoitirwa zvakaipa, somunenge muri mumuviri imiwo.

⁴Kuwanana ngakukudzwe navose, nenhoo ngairege kuva nemhosva; nokuti Mwari achatongesa mhombwe navanofeva.

⁵Musakarira mari pamugariro wenyu; tendai nezvamunazvo; nokuti iye amene akati, “Handingatongokuregeri, handingatongokusiyi.”

⁶Naizvozvo tinotsunga mwoyo, tichiti, “Ishe ndiye mubatsiri wangu; handingatyi; Munhu angandiiteiko?”

⁷Rangarirai vatungamiriri venyu vaikuparidzirai shoko raMwari; cherekedzai kuguma kwokufamba kwavo, mugotevera kutenda kwavo.

⁸Jesu Kristu anogara akadaro zuro, nanhasi, nokusingaperi.

⁹Musatorwa nedzidziso dzimwe dzisingazikanwi; nokuti zvakanaka kuti mwoyo usimbiswe nenyasha; urege kusimbiswa nezvokudya zvisina kubatsira vakafamba mazviri.

¹⁰Isu tine aritari, pasingatenderwi kudyiwa navanoshumira tabhenakeri.

¹¹Nokuti mitumbi yezvipfuwo, zvakaisirwa ropa razvo panzvimbo tsvene nomupristi mukuru nokuda kwezvivi, inopiswa kunze kwemisasa.

¹²Saka naiye Jesuo akatambudzika kunze kwesuo kuti aite vanhu vave vatsvene neropa rake.

¹³Naizvozvo ngatibudire kwaari kunze kwemisasa, titakure kunyadziswa kwake.

¹⁴Nokuti pano hatina guta richagara, asi tinotsvaka richavapo.

¹⁵Naizvozvo ngatirambe tichibayira Mwari naye chibayiro chokumurumbidza, ndicho chibereko chemiromo inopupura zita rake.

¹⁶Asi musakanganwa kuita zvakanaka nokugovana; nokuti Mwari anofara nezvibayiro zvakadai.

¹⁷Tererai vatungamiriri venyu, muzviise pasi pavo; nokuti vanochengeta mweya yenyu, savanhu vanozobvunzwa pamusoro penyu, kuti vaite izvozvo nomufaro, vasingaiti neshungu; nokuti izvozvo hazvikubatsiriyi chinhu.

¹⁸Tinyengetererei; nokuti tinoziva kwazvo kuti tine hana yakanaka, zvatinoda kufamba zvakanaka pazvinhu zvose.

¹⁹Ndinokumbira zvikuru kwamuri kuti muite izvozvo, kuti ndikurumidze kudzoserwa kwamuri.

²⁰Zvino Mwari worugare, akadzosa kuvakafa mufudzi mukuru wamakwai, iye Ishe wedu Jesu Kristu, neropa resungano isingaperi,

²¹ngaakukwanisei pazvinhu zvose zvakanaka, kuti muite kuda kwake, iye achiita mukati medu izvo zvinofadza pamberi pake, naJesu Kristu ngaave nokubwinya nokusingaperi-peri. Ameni.

²²Asi ndinokurayirai, hama dzangu, kuti mutende neshoko rokurayira, nokuti ndakakunyorerai mashoko mashoma.

²³Zivai kuti hama yedu Timoti akasunungurwa; kana akakurumidza kusvika, ndinozokuonai pamwechete naye.

²⁴Ndikwazisirei vatungamiri venyu vose navatsvene vose. VeItariya vanokukwazisai.

²⁵Nyasha ngadzive nemi mose. Ameni.