Read Shona Union Version 2002 VAHEBHERU 2 Bible Online

VAHEBHERU 2 - Shona Union Version 2002 bible

VAHEBHERU 2

¹Saka tinofanira kuteerera zvikuru izvo zvatakanzwa, kuti tirege kukukurwa.

²Nokuti kana shoko rakanga rataurwa navatumwa, rakanga rakasimba, uye kana kudarika nokusateerera kwose kwakapiwa mubayiro wakarurama,

³ko isu tichatiza sei, kana tisina hanya nokuponeswa kukuru kwakadai? Uku kwakaparidzwa pakutanga naIshe, kukasimbiswa kwatiri naivo vakanzwa;

⁴naiye Mwariwo achipupurirana navo nezviratidzo nezvinoshamisa, namabasa esimba mazhinji, nezvipo zvoMweya Mutsvene, nokuda kwake.

⁵Nokuti nyika inozouya, yatinoreva, haana kuiisa pasi pavatumwa.

⁶Asi mumwe akapupura kwazvo paneimwe nzvimbo, achiti, “Ko munhu chinyiko, zvamunomufunga? Kana Mwanakomana womunhu, zvamunomushanyira?

⁷Makamuita muduku zvishoma kuvatumwa, Makamushongedza korona yokubwinya nokukudzwa,

⁸Mukaisa zvinhu zvose pasi petsoka dzake.” Nokuti pakuisa kwake zvinhu zvose pasi pake, haana kusiya chinhu chimwe, chisina kuiswa pasi pake. Asi zvino tigere kuona kuti zvinhu zvose zvakaiswa pasi pake.

⁹Asi tinomuona, iye Jesu, akaitwa muduku zvishoma kuvatumwa, akashongedzwa korona yokubwinya nokukudzwa nokuda kwokutambudzika kworufu, kuti nenyasha dzaMwari anzwe rufu nokuda kwavose.

¹⁰Nokuti zvakanga zvakafanira kuti iye, akaitirwa zvinhu zvose, uye akaita zvinhu zvose, pakuisa kwake vanakomana vazhinji pakubwinya, akwanise Mutungamiriri wokuponeswa kwavo nenzira yokutambudzika.

¹¹Nokuti uyo, anovaita vatsvene, naivo vanoitwa vatsvene, vose vakabva kunomumwe; nemhaka iyi haana nyadzi kuvaidza hama,

¹²Zvaanoti, “Ndichaparidzira hama dzangu zita renyu, Ndichakuimbirai pakati pekereke.”

¹³Uyezve, “Ndichatenda kwaari.” Uyezve, “Tarira, ndini navana vandakapiwa naMwari.”

¹⁴Naizvozvo, vana zvavakagoverwa ropa nenyama, naiyewo akagovana navo panaizvozvi; kuti nokufa kwake iye aparadze uyo ane simba rorufu, iye Dhiabhori;

¹⁵agosunungura avo vaiva varanda paupenyu hwavo hwose nokuda kwokutya rufu.

¹⁶Nokuti zvirokwazvo, haabatsiri vatumwa, asi anobatsira vana vaAbhurahamu.

¹⁷Naizvozvo akafanira kuti aenzaniswe nehama dzake pazvinhu zvose, kuti ave mupristi mukuru ane ngoni, akatendeka pazvinhu zvaMwari, kuti adzikinure zvivi zvavanhu.

¹⁸Nokuti zvaakatambudzika iye amene pakuedzwa kwake, anogona kubatsira vanoedzwa.