Read Shona Union Version 2002 VAHEBHERU 7 Bible Online

VAHEBHERU 7 - Shona Union Version 2002 bible

VAHEBHERU 7

¹Nokuti Merekizedheki uyo, mambo weSaremi, mupristi waMwari Wokumusoro-soro, akasangana naAbhurahamu pakudzoka kwake andouraya madzimambo, akamuropafadza;

²Abhurahamu akamupawo chegumi chezvose; iye pakutanga ari mambo wokururama, kana zvichishandurwa, uyezve, mambo weSaremi, ndokuti, mambo worugare;

³asina baba, asina mai, asina madzisekuru, asina kutanga kwamadzisekuru, asina kutanga kwamazuva, kana kuguma kwoupenyu, asi akafananidzwa noMwanakomana waMwari, anogara ari mupristi nokusingaperi.

⁴Zvino fungai kukura kwomunhu uyu, akapiwa natateguru Abhurahamu chegumi chezvaakapamba.

⁵Zvino avo, vari vanakomana vaRevhi, vanopiwa basa roupristi, vakarayirwa nomurayiro kuti vatore chegumi kuvanhu, iko kuhama dzavo, kunyange vakabva muchiuno chaAbhurahamu;

⁶asi uyu, asina kuravirwa rudzi rwake kwavari, akapiwa zvegumi naAbhurahamu, akamuropafadza iye akanga ane zvipikirwa.

⁷Zvino hatingarambi kuti muduku ndiye anoropafadzwa noanopfuura nokunaka.

⁸Uye pano, vanhu vanofa, vanopiwa zvegumi; asi apo uyo anopiwa, anopupurirwa zvichinzi mupenyu.

⁹Zvino tingati, naRevhi anopiwa zvegumi, iyewo akapa zvegumi naAbhurahamu;

¹⁰nokuti akanga achiri muchiuno chababa vake, pakusangana kwaMerekizedheki naye.

¹¹Naizvozvo, kana kukwaniswa kwaivapo nenzira youpristi hwaRevhi (nokuti vanhu vakapiwa murayiro nokuda kwahwo), ko mumwe mupristi aifanira kuzomuka seiko anorudzi naMerekizedheki, asinganzi anorudzi naAroni?

¹²Nokuti kana upristi huchisandurwa, nomurayiro unofanira kuti ushandurwewo.

¹³Nokuti uyo anorehwa zvinhu izvi pamusoro pake, akanga ari worumwe rudzi, rwakanga rusina munhu akambobata basa paaritari.

¹⁴Nokuti zvinoonekwa pachena, kuti Ishe wedu akabva kuna Judha; pamusoro porudzi urwu, Mosesi haana kureva zvavapristi.

¹⁵Izvi zvinoratidzwawo kwazvo, kana kuchimuka mumwe mupristi akafanana naMerekizedheki,

¹⁶asina kuitwa mupristi nomurayiro wokurayira kwenyama, asi nesimba rohupenyu husingapedzwi.

¹⁷Nokuti iye anopupurirwa, zvichinzi, “Iwe uri mupristi nokusingaperi, Anorudzi naMerekizedheki.”

¹⁸Nokuti murau wokutanga unokoneswa nokuda kwoutera hwawo, uye nokuti hauna maturo,

¹⁹(nokuti murayiro hauna kukwanisa chinhu), zvino tariro, inopfuura nokunaka, ikaiswapo, yatinoswedera nayo kuna Mwari.

²⁰Uyezve, zvaasina kuitwa mupristi kusina mhiko;

²¹nokuti ivo vakaitwa vapristi kusina mhiko, asi iye nokupika kwaiye, akati kwaari, “Ishe akapika, haangazvidyi mwoyozve, achiti, ‘Iwe uri mupristi nokusingaperi.’ ”

²²Saizvozvo Jesu akaitwa rubatso rwesungano inopfuura nokunaka.

²³Ivo vaiva vapristi vazhinji, nokuti vakadziviswa norufu kugara nokusingaperi;

²⁴asi iye, zvaanogara nokusingaperi, anoupristi husingapfuudzwi kunomumwe.

²⁵Naizvozvo ane simba rokuponesa kwazvo-kwazvo avo vanoswedera kuna Mwari naye, zvaanorarama nokusingaperi kuti avareverere.

²⁶Nokuti mupristi mukuru akadai ndiye ataifanira kuva naye, mutsvene, asina chakaipa, asina kusvibiswa, akaparadzaniswa navatadzi, akakwidzwa kumusoro kwedenga;

²⁷asingafaniri, savaya vapristi vakuru, kubayira zuva rimwe nerimwe, pakutanga pamusoro pezvivi zvavo, pashure pamusoro pezvivi zvavanhu; nokuti akaita izvozvi kamwechete, zvikapera, pakuzviita kwake chibayiro.

²⁸Nokuti murayiro unogadza vanhu vanoutera, kuti vave vapristi vakuru; asi shoko rokupika, rakatevera murayiro, rinogadza Mwanakomana, akakwaniswa nokusingaperi.