Read Shona Union Version 2002 VAHEBHERU 9 Bible Online

VAHEBHERU 9 - Shona Union Version 2002 bible

VAHEBHERU 9

¹Zvino, neyiyi sungano yokutanga yakanga ine mirayiro yokushumira Mwari nayo, neimba tsvene yenyika.

²Nokuti tabhenakeri, yaiva yokutanga, yakagadzirwa, makanga mune chigadziko chemwenje, netafura, nezvingwa zvokuratidza; ndipo panonzi Patsvene.

³Zvino mberi kwechidzitiro chechipiri pakanga pane tabhenakeri yainzi Patsvene-tsvene;

⁴pakanga pane ndiro yendarama yezvinonhuwira, neareka yesungano, yakanga yakanamwa nhivi dzose nendarama, imomo makanga mune hari yendarama, yakanga ine mana, netsvimbo yaAroni yakadeya kutungira, namahwendefa esungano;

⁵pamusoro payo pakanga panamakerubhi okubwinya, akadzikatidza chifunhiro chengoni; hatigoni kurondedzera izvozvo tichiita chimwechimwe zvino.

⁶Zvinhu izvi zvakati zvagadzirwa saizvozvo, vapristi vaipinda mutabhenakeri yokutanga nguva dzose, vachibata mabasa okushumira Mwari;

⁷asi muneyechipiri mupristi mukuru aipinda ari oga, kamwechete pagore, asingapindi asina ropa, raaizvibayirira iye nezvivi zvavanhu;

⁸Mweya Mutsvene achiratidza chinhu ichi, kuti nzira inoenda kuNzvimbo Tsvene yakanga isati yataridzwa, tabhenakeri yokutanga ichimire;

⁹wakanga uri mufananidzo wenguva ino vanobayira nayo zvipo nezvibayiro, zvisingagoni kukwanisa pahana yake iye anoshumira;

¹⁰nokuti yaingova mirayiro yenyama, yezvokudya, nezvokunwa, nokushamba kuzhinji, yavakatemerwa kusvikira panguva yokuvandudzwa.

¹¹Asi Kristu akati asvika ari mupristi mukuru wezvinhu zvakanaka zvinozouya, akapinda nomutabhenakeri yakapfuura pakukura napakukwana, isina kuitwa namaoko, ndiko kuti, isati iri yokusikwa kuno,

¹²haana kupinda neropa rembudzi kana remhuru, asi neropa rake chairo, kamwechete, zvikapera, panzvimbo tsvene, akatiwanira rudzikinuro rusingaperi.

¹³Nokuti kana ropa rembudzi nerenzombe namadota etsiru, kana zvichisaswa pamusoro pavakasvibiswa, zvichivaita vatsvene, kuti vanatswe panyama,

¹⁴zvikuru sei ropa raKristu iye wakazviita noMweya usingaperi chibayiro kuna Mwari, chisina chachingapomerwa, richanatsa hana dzedu pamabasa akafa, kuti tishumire Mwari mupenyu.

¹⁵Nemhaka iyo, iye ndiMurevereri wesungano itsva, kuti, rufu zvarwakasvika kuzodzikinura avo vakadarika pasungano yokutanga, vakadanwa vagopiwa chipikirwa chenhaka isingaperi.

¹⁶Nokuti apo pane chido chenhaka, panofanira kuvapowo rufu rwaiye wakachiita.

¹⁷Nokuti chido chenhaka chine simba kana vanhu vafa; nokuti haitongovi nesimba kana akachiita achiri mupenyu.

¹⁸Naizvozvo nesungano yokutanga haina kuvambwa pasina ropa.

¹⁹Nokuti zvirevo zvose zvakati zvataurwa kuvanhu vose naMosesi sezvakareva murayiro, iye akatora ropa remhuru nerembudzi, pamwechete nemvura namakushe matsvuku, nehisopi, akasasa bhuku imene navanhu vose,

²⁰achiti, “Iri iropa resungano, yamakarayirwa naMwari.”

²¹Uyezve, akasasa saizvozvo neropa tabhenakeri nemidziyo yose yokushumira nayo.

²²Zvirokwazvo, tingati pamurayiro zvinhu zvinenge zvose zvinonatswa neropa; uye kana kusina ropa rinoteurwa, hakuna ruregerero.

²³Naizvozvo mifananidzo yezviri kudenga yaifanira kuti inatswe nezvibayiro izvi; asi zvinhu zvokudenga zvimene kuti zvinatswe nezvibayiro zvinopfuura izvi nokunaka.

²⁴Nokuti Kristu haana kupinda munzvimbo tsvene yakaitwa namaoko, inofananidza iyo iri chaiyo, asi akapinda kudenga kumene, kuti zvino azviise pamberi paMwari nokuda kwedu;

²⁵uye haana kupinda kuti azviite chibayiro kazhinji, somupristi mukuru anopinda munzvimbo tsvene gore rimwe nerimwe, akabata ropa rezvimwe zvinhu;

²⁶nokuti dai zvakanga zvakadaro, angadai aitambura kazhinji kubva pakuvambwa kwenyika; asi zvino akaonekwa kwamwechete pakupedzisira kwenguva, kuti aparadze zvivi, nokuzviita chibayiro kwake.

²⁷Uye vanhu zvavakatemerwa kuti vafe kamwechete, kutongeswa kugotevera,

²⁸saizvozvo Kristuwo, zvaakaitwa chibayiro kamwechete, kuti atakure zvivi zvavanhu vazhinji, achazoonekwa rwechipiri, asingatakuri zvivi, naivo vanomutarira kuti avaponese.