Read Shona Union Version 2002 JAKOBHO 1 Bible Online

JAKOBHO 1 - Shona Union Version 2002 bible

JAKOBHO 1

¹Jakobho, muranda waMwari nowaIshe Jesu Kristu, kumarudzi ane gumi namaviri akapararira: Farai!

²Hama dzangu, muti mufaro bedzi kana muchiwira mumiedzo mizhinji;

³muchiziva kuti kuedzwa kwokutenda kwenyu kunobereka kutsungirira.

⁴Asi kutsungirira ngakuve nebasa rakakwaniswa, kuti mukwane, mururame kwazvo, musingashayiwi chinhu.

⁵Zvino kana mumwe wenyu achishayiwa kuchenjera ngaakumbire kuna Mwari, anongopa vose asingazotuki; achapiwa hake.

⁶Asi ngaakumbire nokutenda, asinganyunyuti napaduku; nokuti munhu anonyunyuta akaita sefungu regungwa rinosundwa nemhepo richimutswamutswa.

⁷Munhu uyu ngaarege kufunga kuti achazowana chinhu kuna Ishe;

⁸munhu, ane mwoyo miviri, anoshandukashanduka panzira dzake dzose.

⁹Asi hama iri muduku zvayo ngaafare nokukudzwa kwake;

¹⁰nomupfumi nokuninipiswa kwake, nokuti achapfuura seruva rouswa.

¹¹Nokuti zuva rinobuda pamwechete nemhepo inopisa, ndokuomesa uswa; ruva rahwo rinowira pasi, nokunaka kwahwo kwakanga kwaonekwa kunopera; saizvozvowo mupfumi achasvava panzira dzake.

¹²Akaropafadzwa munhu uyo anotsunga mwoyo pakuedzwa; nokuti kana atendwa, achapiwa korona yohupenyu yakapikirwa avo vanomuda.

¹³Kana munhu achiedzwa, ngaarege kuti ndinoedzwa naMwari; nokuti Mwari haangaedzwi nezvakaipa, naiye amene haangaedzi munhu.

¹⁴Asi munhu mumwe nomumwe anoedzwa kana achikwewa nokuchiva kwake achinyengerwa.

¹⁵Zvino kuchiva, kana kwarema, kunozvara zvivi; nezvivi, kana zvakura, zvinobereka rufu.

¹⁶Musanyengerwa, hama dzangu dzinodikanwa.

¹⁷Zvipo zvose zvakanaka nezvipiwa zvose zvakakwana zvinobva kumusoro, zvichiburuka kuna Baba vezviedza, uyo asina kupinduka kana mumvuri wokushanduka.

¹⁸Nokuda kwake akatibereka neshoko rechokwadi, kuti isu tiite sechibereko chokutanga chezvisikwa zvake.

¹⁹Munozviziva henyu izvozvi, hama dzangu dzinodikanwa. Asi munhu mumwe nomumwe ngaakurumidze kunzwa, anonoke kutaura, anonoke kutsamwa;

²⁰nokuti kutsamwa kwomunhu hakuiti kururama kwaMwari.

²¹Saka bvisai tsvina yose nokuipa kwakawanda, mugamuchire nomwoyo munyoro shoko rakasimwa mukati menyu, rinogona kuponesa mweya yenyu.

²²Asi ivai vaiti veshoko, musava vanzwi voga, muchizvinyengera.

²³Nokuti kana munhu ari munzwi weshoko, asati ari muiti waro, akafanana nomunhu anoona chiso chake, chaakaberekwa nacho, muchionioni.

²⁴Nokuti anozviona, ndokuenda, ndokukanganwa pakarepo kuti akadini iye.

²⁵Asi munhu anocherekedza murayiro wakakwana, iwo murayiro wokusunungurwa, akaramba achidaro, asati ari munzwi, anokanganwa, asi muiti webasa, iye acharopafadzwa pane zvaanoita.

²⁶Kana munhu achiti ndinonamata Mwari, asingadzori rurimi rwake, asi achinyengera mwoyo wake, kutenda kwaiyeyo munhu hakuna maturo.

²⁷Kunamata, kwakarurama, kusina mhosva pamberi paMwari wedu naBaba, ndiko kufambira nherera nechirikadzi mukutambudzika kwavo, nokuzvichengeta, kuti arege kusvibiswa nenyika.