Read Shona Union Version 2002 1 PETIROSI 5 Bible Online

1 PETIROSI 5 - Shona Union Version 2002 bible

1 PETIROSI 5

¹Naizvozvo ndinorayira vakuru pakati penyu, ini mukuru pamwechete navo nechapupu chamadambudziko aKristu, nomugovani nawo wokubwinya kuchazoratidzwa, ndichiti:

²Fudzai boka raMwari riri pakati penyu, musingazviiti nokurovererwa, asi nomwoyo unoda nokuda kwaMwari, musingazviiti nokuda kwokukarira pfuma yakaipa;

³musingaiti nesimba nezvamakagoverwa, asi muve vatungamiriri veboka.

⁴Kana Mufudzi mukuru achizoonekwa, muchawana korona yokubwinya isingasvavi.

⁵Saizvozvo imi vaduku, muzviise pasi pavakuru, nemi mose pfekai kuzvininipisa mumwe kune mumwe, nokuti Mwari anodzivisa vanozvikudza, asi anopa nyasha vanozvininipisa.

⁶Naizvozvo zvininipisei pasi poruoko rune simba rwaMwari, kuti akukudzei nenguva yakafanira;

⁷kandirai pamusoro pake kufunganya kwenyu kwose, nokuti iye anokuchengetai.

⁸Svinurai, murinde; muvengi wenyu Dhiabhori, anofamba-famba seshumba inorira, ichitsvaka waingaparadza.

⁹Mumudzivisei, makamira nesimba pakutenda, muchiziva kuti kutambudzika ikoko kunoitirwa hama dzose dziri panyika.

¹⁰Zvino Mwari wenyasha dzose, iye akakudanirai kukubwinya kwake kusingaperi muna Kristu, kana mambotambudzika kanguva kaduku, achakukwanisai, nokukumisai, nokukusimbisai, nokukuteyai.

¹¹Ngaave nesimba nokusingaperiperi. Ameni.

¹²Ndakakunyorerai mashoko mashomanene naSirivhano, hama yakatendeka pakufunga kwangu, ndichirayira, nokupupura kuti idzi ndidzo nyasha dzechokwadi dzaMwari; mirai madziri.

¹³Kereke iri muBhabhironi, yakasanangurwa pamwechete nemi, naMako, mwanakomana wangu, vanokukwazisai.

¹⁴Kwazisanai nokutsvoda kworudo. Rugare ngaruve nemi mose muri muna Kristu.