Read Shona Union Version 2002 2 PETIROSI 3 Bible Online

2 PETIROSI 3 - Shona Union Version 2002 bible

2 PETIROSI 3

¹Vadikanwi, iyi ndiyo tsamba yechipiri yandinokunyorerai zvino; pane idzodzi dzose mbiri ndinomutsa ndangariro dzenyu ndichikuyeudzirai;

²kuti mugorangarira mashoko akataurwa kare navaporofita vatsvene, nomurayiro waIshe, Muponesi, wamakapiwa navapostori venyu;

³pakutanga muzive henyu chinhu ichi, kuti pamazuva okupedzisira vaseki vachauya vachiseka, vachifamba nokuchiva kwavo,

⁴vachiti, “Chipikirwa chokuuya kwake chiripiko zvino? Nokuti kubva pakuparara kwamadzibaba, zvinhu zvose zvinongoramba zvakaita sezvazvakanga zvakaita kubva pakutanga kwokusikwa.”

⁵Nokuti vanokanganwa nohwoni chinhu ichi, kuti kare denga raivapo, nenyika yakabudiswa mumvura, yakaitwa nemvura neshoko raMwari;

⁶nazvo nyika, yaivapo nguva iyo, yakafukidzwa nemvura ikaparadzwa;

⁷asi denga, riripo zvino, nenyika, zvakavigirwa moto neshoko irori, zvinochengetererwa zuva rokutonga, nerokuparadzwa kwavanhu vasingadi Mwari.

⁸Asi vadikanwi, musakanganwa chinhu chimwe ichi, kuti kuna Ishe zuva rimwe rakaita samakore ane chiuru, namakore ane chiuru sezuva rimwe.

⁹Ishe haanonoki kuita sezvaakapikira, sezvinoreva vamwe vachiti, “Anonoka, asi ano mwoyo murefu kwamuri, nokuti haadi kuti vamwe varashike, asi kuti vose vatendeuke.”

¹⁰Asi zuva raIshe richauya sembavha; naro denga richapfuura nokutinhira kukuru, nezvedenga zvichaparadzwa zvichipiswa, nenyika namabasa ari mairi achapiswa.

¹¹Izvi zvose zvazvichaparadzwa saizvozvo, imi munofanira kuva vanhu vakadiniko pamufambiro wenyu mutsvene nokunamata Mwari,

¹²imi munotarira nokushuvawo kwazvo kuuya kwezuva raMwari; naro denga richaparadzwa nokutsva, nezvedenga zvichanyauka zvichipiswa.

¹³Asi sezvaakapikira, tinotarira denga idzva nenyika itsva, munogara kururama mazviri.

¹⁴Saka vadikanwi, zvamunotarira zvinhu izvi, shingairai kuti muwanikwe naye muno rugare, musina ruvara, musina mhosva;

¹⁵muchiti, mwoyo murefu waIshe wedu ruponeso; saPauro, hama yedu inodikanwa, akakunyoreraiwo nokuchenjera kwaakapiwa;

¹⁶sezvaanotaura mumatsamba ake ose pamusoro pezvinhu izvi; madziri mune zvimwe zvikukutu kunzwisiswa; zvinominamiswa, samamwe magwarowo, navasingazivi navasina simba, kusvikira vaparadzwa.

¹⁷Naizvozvo imi vadikanwi, zvamunoziva zvinhu izvi zvisati zvaitwa, chenjerai kuti murege kurashwa nokutsauka kwavakashata, muve pakusimba kwenyu.

¹⁸Asi kurai munyasha napakuziva Ishe wedu, Muponesi Jesu Kristu. Ngaave nokubwinya zvino, nokusingaperi. Ameni.