Read Shona Union Version 2002 1 JOHANI 3 Bible Online

1 JOHANI 3 - Shona Union Version 2002 bible

1 JOHANI 3

¹Tarirai kukura kworudo rwatakaitirwa naBaba, kuti tinzi vana vaMwari; ndizvo zvatiriwo; saka nyika haitizivi, nokuti haina kumuziva iye.

²Vadikanwi, zvino tiri vana vaMwari, uye zvichigere kuratidzwa kuti tichazovei. Tinoziva kuti kana achizooneswa, isu tichafanana naye; nokuti tichamuona sezvaakaita.

³Mumwe nomumwe ane tariro iyi kwaari, anozvichenesa sezvaakachena iye.

⁴Mumwe nomumwe anoita zvivi, anodarika nomurayirowo; zvivi ndiko kudarika murayiro.

⁵Munoziva kuti iye akaoneswa kuti abvise zvivi; maari hamuna zvivi.

⁶Mumwe nomumwe anogara maari, haaiti zvivi; mumwe nomumwe anoita zvivi, haana kumuona kana kumuziva.

⁷Vana vaduku, musatsauswa nomunhu; uyo, anoita zvakarurama, akarura, saiye akarurama.

⁸Uyo, anoita zvivi, ndowaDhiabhori, nokuti Dhiabhori anoita zvivi kubva pakutanga. Mwanakomana waMwari akaoneswa nemhaka iyi kuti aparadze mabasa aDhiabhori.

⁹Mumwe nomumwe akaberekwa naMwari haaiti zvivi, nokuti mbeu yake inogara maari, haagoni kuita zvivi, nokuti akaberekwa naMwari.

¹⁰Vana vaMwari vanooneswa naizvozvi, navana vaDhiabhori; mumwe nomumwe asingaiti zvakarurama, haazi waMwari, naiyewo asingadi hama yake.

¹¹Nokuti ndiro shoko ramakanzwa kubva pakutanga, kuti tidane;

¹²tisingaiti saKaini, akanga ari wowakaipa, akauraya munun'una wake. Akamuurayireiko? Nokuti mabasa ake akanga akaipa, asi omunun'una wake akanga akarurama.

¹³Musashamiswa, hama dzangu, kana nyika ichikuvengai.

¹⁴Tinoziva kuti takabva murufu, tapinda muupenyu, nokuti tinoda hama. Uyo, asingadi, anogara murufu.

¹⁵Mumwe nomumwe anovenga hama yake, muurayi; munoziva kuti hakuna muurayi ano upenyu husingaperi hugere maari.

¹⁶Ndozvatinoziva rudo nazvo, kuti akatipa upenyu hwake; nesuo tinofanira kupa hama upenyu hwedu.

¹⁷Asi kana munhu ane pfuma yenyika, akaona hama yake ichishayiwa, akamupfigira tsitsi dzake, rudo rwaMwari runogara seiko maari?

¹⁸Vana vaduku, ngatirege kuda neshoko kana norurimi, asi nebasa nechokwadi.

¹⁹Ndozvatichaziva nazvo kuti tiri vechokwadi, tigosimbisa mwoyo yedu pamberi pake;

²⁰nokuti kana mwoyo yedu ichitipa mhaka, Mwari mukuru kumwoyo yedu, anoziva zvose.

²¹Vadikwanwi, kana mwoyo usingatipi mhaka, tinako kusatya pamberi paMwari;

²²uye zvose zvatinokumbira tinopiwa naye, nokuti tinochengeta mirayiro yake, tichiita zvinomufadza.

²³Ndiwo murayiro wake, kuti titende kuzita roMwanakomana wake, Jesu Kristu, uye tidane, sezvaakatirayira.

²⁴Anochengeta mirayiro yake, anogara maari, naiye maari. Ndizvo zvatinoziva nazvo kuti anogara matiri; noMweya waakatipa.