Read Shona Union Version 2002 Vatongi 10 Bible Online

Vatongi 10 - Shona Union Version 2002 bible

Vatongi 10

¹Shure kwaAbhimereki, Tora mwanakomana waPua, mwanakomana waDhodho, murume waIsakari, wakamuka akaponesa Isiraeri; iye waigara paShamiri panyika yamakomo yaEfuremu.

²Iye akatonga vaIsiraeri makore ana makumi maviri namatatu, akafa; akavigwa paShamiri.

³Shure kwake Jairi muGireadhi wakamuka, iye akatonga vaIsiraeri makore ana makumi maviri namaviri.

⁴Wakanga ana vanakomana vana makumi matatu, vaitasva vana vembongoro vana makumi matatu, uye vakanga vana maguta ana makumi matatu, anonzi Havhori-jairi kusvikira nhasi, ari munyika yeGireadhi.

⁵Jairi akafa, akavigwa paKamoni.

⁶Vana vaIsiraeri vakaitazve zvakaipa pamberi paJehovha, vakashumira vaBhaari navaAshitaroti navamwari vavaSiria, navamwari veSidhoni, navamwari vaMoabhu, navamwari vavana vaAmoni, navamwari vavaFirisitia; vakarasha Jehovha, vakasamushumira.

⁷Ipapo kutsamwa kwaJehovha kwakamukira vaIsiraeri, akavatengesa mumaoko avaFirisitia, nomumaoko avana vaAmoni.

⁸Ivo vakanetsa nokumanikidza vana vaIsiraeri gore iro; vakamanikidza vana vaIsiraeri vose vakanga vagere mhiri kwaJorodhani munyika yavaAmori, yaiva paGireadhi, makore ane gumi namasere.

⁹Zvino vana vaAmoni vakayambuka Jorodhani, vakarwawo navaJudha, navaBhenjamini, uye neimba yavaEfuremu; naizvozvo vaIsiraeri vakamanikidzwa kwazvo.

¹⁰Zvino vaIsiraeri vakachema kuna Jehovha, vakati, “Takakutadzirai imi, nokuti takarasha Mwari wedu, tikashumira vaBhaari.”

¹¹Jehovha akati kuvana vaIsiraeri, “Handina kukuponesai here pavaIjipiti, navaAmori, navana vaAmoni, navaFirisitia?

¹²VaSidhoni, navaAmareki, navaMaoni vakakutambudzaiwo, imi mukachema kwandiri, ndikakuponesai pamaoko avo.

¹³Kunyange zvakadaro makandirasha, mukandoshumira vamwe vamwari; naizvozvo handina kukuponesaizve.

¹⁴Endai mundochema henyu kuvamwari vamakazvisanangurira; ivo ngavakuponesei panguva yokutambudzika kwenyu.”

¹⁵Vana vaIsiraeri vakati kuna Jehovha, “Takatadza; tiitirei henyu sezvamunofunga, asi tinokumbira kuti mutirwirei henyu nhasi.”

¹⁶Ipapo vakarasha vamwari vatorwa vakanga vari pakati pavo, vakashumira Jehovha; mwoyo wake ukachema pamusoro pokutambudzika kwavaIsiraeri.

¹⁷Zvino vana vaAmoni vakanga vaungana, vakadzika matende avo paGireadhi. Vana vaIsiraeri vakaunganawo, vakadzika matende avo paMizipa.

¹⁸Zvino vanhu, iwo machinda aGireadhi, vakataurirana, vakati, “Ndianiko munhu uchatanga kurwa navana vaAmoni? Iye uchava mukuru wavose vagere Gireadhi.”