Read Shona Union Version 2002 Vatongi 13 Bible Online

Vatongi 13 - Shona Union Version 2002 bible

Vatongi 13

¹Zvino vana vaIsiraeri vakaitazve zvakaipa pamberi paJehovha, Jehovha akavaisa mumaoko avaFirisitia makore ana makumi mana.

²Zvino kwakanga kuno mumwe murume weZora, weimba yaDhani, wainzi Manoa; mukadzi wake wakanga asina mwanakomana, asingabereki.

³Mutumwa waJehovha akazviratidza kumukadzi uyu, akati kwaari, “Tarira zvino, iwe haubereki, hauno mwana; asi uchava nemimba, nokubereka mwanakomana.

⁴Naizvozvo zvino chichenjera hako kuti urege kunwa waini, kana zvimwe zvinobata, kana kudya chinhu chisina kunaka;

⁵nokuti tarira, uchava nemimba, nokubereka mwanakomana; musoro wake haufaniri kuveurwa nechisvo, nokuti mwana uyu anofanira kuva muNaziri waMwari kubva padumbu ramai vake; iye uchatanga kuponesa Isiraeri pamaoko avaFirisitia.”

⁶Zvino mukadzi akandoudza murume wake, akati, “Munhu waMwari wakauya kwandiri, chiso chake chakanga chakafanana nechiso chomutumwa waMwari, chaityisa kwazvo; handina kumubvunza kuti unobvepi, uye iye haana kundiudza zita rake;

⁷asi wakati kwandiri, ‘Tarira, uchava nemimba, nokubereka mwanakomana; zvino chirega kunwa waini, kana zvimwe zvinobata, usadya chinhu chisina kunaka, nokuti mwana uyu uchava muNaziri waMwari kubva padumbu ramai vake kusvikira pazuva rokufa kwake.’ ”

⁸Ipapo Manoa akakumbira kuna Jehovha, akati, “Jehovha, ndinokumbira kuti munhu waMwari wamakatuma, auyezve kwatiri, atidzidzise zvatinofanira kuitira mwana uchazozvarwa.”

⁹Jehovha akanzwa izwi raManoa; mutumwa waMwari akauyazve kumukadzi agere pamunda; asi Manoa, murume wake, wakanga asiko kwaari.

¹⁰Mukadzi akakurumidza, akamhanya, akandoudza murume wake, akati kwaari, “Tarira, murume uya wazviratidzazve kwandiri, iye wakadeya kuuya kwandiri musi uya.”

¹¹Manoa akasimuka, akatevera mukadzi, wake akasvika kumurume, akati kwaari, “Ndiwe murume wakataura nomukadzi here?” Iye akati, “Ndini.”

¹²Manoa akati, “Zvino kana mashoko enyu achinge aitika, tsika dzomwana dzinofanira kuva dzipi, nebasa rake rinofanira kuva reiko?”

¹³Mutumwa waJehovha akati kuna Manoa, “Mukadzi ngaachenjere pamusoro pezvose zvandakamuudza.

¹⁴Haafaniri kudya chinhu chipi nechipi chinobva pamuti womuzambiringa; haafaniri kunwa waini, kana zvimwe zvinobata, kana kudya chinhu chisina kunaka; ngaachengete zvose zvandakamuraira.”

¹⁵Manoa akati kumutumwa waJehovha, “Titenderei henyu tikunonosei, tikugadzirirei mbudzana.”

¹⁶Mutumwa waJehovha akati kuna Manoa, “Kunyange ukandinonosa, handingadyi chingwa chako; kana ukada kugadzira chipiriso chinopiswa, unofanira kuchipa Jehovha.” Nokuti Manoa wakanga asingazivi kuti mutumwa waJehovha.

¹⁷Manoa akati kumutumwa waJehovha, “Zita renyu ndianiko? Kuti tizive kukukudzai kana mashoko enyu achizoitika?”

¹⁸Mutumwa waJehovha akati kwaari, “Unondibvunzireiko zita rangu, zvarinoshamisa?”

¹⁹Ipapo Manoa akatora mbudzana pamwechete nechipiriso chezvokudya, akazvibayira Jehovha padombo; mutumwa akaita chinhu chinoshamisa, Manoa nomukadzi wake vakataririra.

²⁰Nokuti murazvo womoto wakati uchikwira kudenga uchibva paatari, mutumwa waJehovha ndokukwira mumurazvo weatari, Manoa nomukadzi wake vakataririra; vakawira pasi nezviso zvavo.

²¹Asi mutumwa waJehovha haana kuzozviratidzazve kuna Manoa, kana kumukadzi wake. Ipapo Manoa akaziva kuti mutumwa waJehovha.

²²Zvino Manoa akati kumukadzi wake, “Tichafa zvirokwazvo, nokuti takaona Mwari.”

²³Asi mukadzi wake wakati kwaari, “Dai Jehovha aida kutiuraya, ungadai asina kugamuchira chipiriso chinopiswa chezvokudya pamaoko edu; ungadai asina kutiratidza mashoko akadai panguva ino.”

²⁴Zvino mukadzi akapona mwanakomana, akamutumidza zita rinonzi Samusoni; mwana akakura, Jehovha akamuropafadza.

²⁵Mweya waJehovha akatanga kumumutsa paMahanedhani, pakati peZora neEshitaori.