Read Shona Union Version 2002 Vatongi 15 Bible Online

Vatongi 15 - Shona Union Version 2002 bible

Vatongi 15

¹Asi nguva duku yakati yapera, panguva yokukohwa zviyo, Samusoni akandoshanyira mukadzi wake, akabata mbudzana; akati, “Ndinoda kupinda kumukadzi wangu mumba.” Asi baba vake vakaramba kumutendera kupinda.

²Baba vake vakati, “Zvirokwazvo, ndakati wamuvenga kwazvo; saka ndakamupa shamwari yako. Ko mun'una wake haamupfuuri nokunaka here? Mutore hake iye panzvimbo yake.”

³Samusoni akati kwavari, “Nguva ino handingavi nemhosva kuvaFirisitia, kana ndikavaitira zvakaipa.”

⁴Ipapo Samusoni akandobata makava ana mazana matatu, akatora mazhenje, akabatanidza miswe miviri-miviri, ndokuisa zhenje pakati pemiswe miviri.

⁵Zvino akatungidza mazhenje, ndokuaregedza, akapinda muzviyo zvavaFirisitia zvakanga zvaunganidzwa nezvakanga zvigere kukohiwa, neminda yemizambiringa neyemiorivhi.

⁶Ipapo vaFirisitia vakati, “Ndianiko waita izvozvo?” Vakati, “NdiSamusoni, mukuwasha womuTimuna, nokuti wakatora mukadzi wake, akamupa shamwari yake.” Zvino vaFirisitia vakakwira, vakamupisa iye nomukadzi nababa vake nomoto.

⁷Samusoni akati kwavari, “Kana mukaita saizvozvo, zvirokwazvo ndichakutsivai, pashure ndigorega.”

⁸Akavarova pazvidya nezviuno, akavauraya nokuuraya kukuru; akaburuka, akandogara pabako redombo reEtami.

⁹Zvino vaFirisitia vakakwira, vakandodzika matende avo paJudha, vakapararira muRehi.

¹⁰Varume vaJudha vakati, “Makwirireiko kuzorwa nesu.” Ivo vakati, “Takwira kuzosunga Samusoni, timuitire sezvaakatiitira isu.”

¹¹Ipapo varume vaJudha vakanga vane zviuru zvitatu vakaburukira kubako redombo reEtami, vakati kuna Samusoni, “Hauzivi kuti vaFirisitia vabati vedu here? Chinyiko ichi chawatiitira?” Akati kwavari, “Sezvavakandiitira ini, ndizvo zvandakavaitirawo.”

¹²Vakati kwaari, “Isu taburukira kuno kuzokusunga, kuti tikuise mumaoko avaFirisitia.” Samusoni akati kwavari, “Pikai kwandiri, kuti imi hamungandivambi mumene.”

¹³Vakataura naye, vakati, “Kwete; asi tichakusunga, nokukuisa mumaoko avo; asi zvirokwazvo hatingakuurayi.” Vakamusunga netambo mbiri itsva, vakakwira naye vachibva padombo.

¹⁴Zvino wakati achisvika Rehi, vaFirisitia vakamupurudzira. Ipapo Mweya waJehovha akauya pamusoro pake nesimba guru; tambo dzakanga dzakasunga maoko ake dzikafanana noruchinda rwakatsva nomoto, zvisungo zvake zvikanyauka pamaoko ake.

¹⁵Akawana rushaya rwembongoro, akatambanudza ruoko rwake, akarutora, ndokuuraya varume vana mazana ane gumi narwo.

¹⁶Ipapo Samusoni akati, “Norushaya rwembongoro ndakauraya boka namapoka, Norushaya rwembongoro ndakauraya vana mazana ane gumi.”

¹⁷Zvino wakati apedza kutaura, akakanda kure rushaya rwakanga ruri muruoko rwake; nzvimbo iyo ikanzi Ramatirehi.

¹⁸Ipapo akanzwa nyota kwazvo, akachema kuna Jehovha, akati, “Matirwira kwazvo noruoko rwomuranda wenyu; zvino ndichafa nenyota, ndikawira mumaoko avasina kudzingiswa.”

¹⁹Asi Mwari wakapamura mukaha paRehi, mvura ikabudapo; zvino wakati anwa, mweya wake ukadzokera maari, akaponazve; naizvozvo ipapo pakatumidzwa Enihakori, tsime riri paRehi kusvikira nhasi.

²⁰Iye akatonga vaIsiraeri makore makumi maviri pamazuva avaFirisitia.